560 dagar síðan að Kolbeinn var síðast í íslenska landsliðinu

Kolbeinn Sigþórsson var í dag valinn aftur í íslenska landsliðið í fótbolta en þessa dagana eru liðnir tæpir nítján mánuðir síðan að einn mesti markaskorari landsliðsins frá upphafi var síðast valinn í landsliðshóp.

2. september 2016 er sögulegri dagur en margur heldur. Þennan dag var íslenska fótboltlandsliðið statt í Frankfurt í Þýskalandi að undirbúa sig fyrir fyrsta leikinn sinn í undankeppni HM 2018.

Þennan dag kom frétt inn á heimasíðu KSÍ þar sem var sagt frá því að framherjinn Kolbeinn Sigþórsson yrði ekki með íslenska landsliðinu í leiknum á móti Úkraínu sem fór fram í Kiev 5. september 2016.

Kolbeinn hafði verið allt í öllu í nýloknu EM-ævintýri íslenska landsliðsins í Frakklandi og skoraði í tveimur síðustu leikjum sínum þar af sigurmarkið á móti Englandi í sextán liða úrslitunum.

Kolbeinn hefur alls skorað 22 mörk í 44 landsleikjum og vantar fjögur mörk í að jafna markamet Eiðs Smára Guðjohnsen sem skoraði 26 mörk í 88 landsleikjum fyrir Ísland.

Landsliðsþjálfarinn Heimir Hallgrímsson hafði valið Kolbein í hópinn fyrir Úkraínuleikinn í september 2016 og hann hafði verið í meðhöndlun hjá sjúkraþjálfurum og lækni landsliðsins í Frankfurt, þar sem liðið var við æfingar.

„Nú hefur verið ákveðið að tefla Kolbeini ekki fram í leiknum á mánudag. Ákvörðunin er tekin í fullu samráði leikmannsins sjálfs, þjálfara íslenska liðsins og sjúkrateymis. Kolbeinn heldur nú til Tyrklands þar sem hann fer í frekari skoðun og meðferð hjá læknateymi Galatasaray,“ sagði í fréttinni á heimasíðu KSÍ.

Kolbeinn missti ekki aðeins af þessum leik á móti Úkraínu í september 2016 heldur öllum leikjum íslenska liðsins í undankeppninni.

Í dag rann svo loksins upp dagurinn þegar Kolbeinn var aftur valinn í íslenska landsliðið. Hann er í hóp Heimis Hallgrímssonar sem er á leiðinni til Bandaríkjanna þar sem liðið mætir Mexíkó og Perú í vináttulandsleikjum.