Gyðingar fresta ferðum til Íslands

Jón Gunnar Benjamínsson, sem á og rekur ferðaþjónustuna Iceland Unlimited, vakti athygli á bréfi sem honum barst frá gyðingi í gærkvöldi í Facebookhópi sem kallast Bakland ferðaþjónustunnar.

„Hér er sármóðgaður einstaklingur af gyðingaætt, að hætta við að bóka „self-drive“ ferð með okkur vegna tilvonandi frumvarps um bann við umskurði sveinbarna, ásamt því jafnframt að hóta því að breiða út sitt “fagnaðar”erindi til vina og vandamanna,“ skrifar Jón Gunnar.

Hann birtir bréfið og spyr hvort fleirum í ferðaþjónustunni hafi borist bréf af svipuðum toga? Víst er að hið umdeilda mál hefur vakið verulega athygli utan landsteina.

Bréfritari segir að sér sé brugðið, hann sé hneykslaður. Hann hafa verið kominn á fremsta hlunn með að panta sér ferð til Íslands. En þá frétti hann af umskurðsfrumvarpi Silju Daggar Gunnarsdóttur, þingmanns Framsóknarflokksins, og ákvað snarlega að fresta ferð til Íslands. Hann vildi sjá hvernig alþingi Íslendinga myndi afgreiða málið.

Ætlar að beita sér gegn ferðaþjónustu á Íslandi

Óbeinar hótanir má svo finna í bréfinu, en bréfritari segir að ef það fari svo að bann verði lagt við umskurð á drengjum á Íslandi muni hann beita sér fyrir því, meðal annars í hinu stóra gyðingasamfélagi á Bostonsvæðinu, að menn fari aldrei til Íslands.

Bakland ferðaþjónustunnar er Facebookhópur þar sem ýmsir í ferðaþjónustunni koma saman og ráða ráðum sínum. Viðbrögðin við erindi Jóns Gunnars heldur á eina leið. Fordæming á þessu erindi; mönnum blöskrar frekjan.

Umskerum ekki hvítvoðunga í þágu ferðaiðnaðar

„Við umskerum ekki hvítvoðunga í þágu ferðaiðnaðar, það er alveg á hreinu!“ segir einn. Annar segir: „Ég er orðlaus , frekjan að halda að ferðaþjónustuaðili stjórni ríkisstjórn okkar, hann er kanski vanur svo sé i öðrum löndum.“ Og enn annar bætir við: „Það má benda á MJÖG MARGAR siðferðilegar ástæður til að heimsækja hvorki BNA né Ísrael ef það á að nota sömu röksemdafærslu og hann.“

Jóni Gunnari er ráðlagt að svara manninum fullum hálsi. Í samtali við Vísi segist Jón Gunnar hafa skrifað manninum kurteislegt svarbréf. Annað hafi ekki verið í boði.

Kröfuharðir ferðamenn

„Ég var ekkert að vaða í manninn fyrir þetta,“ segir hann. Spurður hvort hann kannaðist við fleiri erindi svipað eðlis meðal kollega sinna segir hann að einn hafi upplýst um að svissnesk ferðaskrifstofa hefði boðað fjölda afbókana yrði frumvarpið að veruleika.

„Þetta er nú ekkert óvenjulegt úr þessum ranni svosem,“ segir Jón Gunnar. Hann lætur þetta ekki slá sig út af laginu, reyndur á þessu sviði og minnist þess þegar meirihlutinn í Reykjavík vildi beita sér fyrir banni á ísraelskar vörur.  „Og allt varð brjálað. Ég hef alltaf átt gott samstarf við fólk af ætt gyðinga og á von á að svo verði áfram.“

En, nú hefur flogið fyrir að þeir geti reynst erfiðir ferðamenn?

„Þeir eru vissulega mjög kröfuharðir og vita hvað þeir vilja. Reyna prútta fram á síðustu stundu,“ segir Jón Gunnar og lætur sér hvergi bregða.

Ath. Fréttin hefur verið uppfærð til samræmis við það að Vísir náði viðtali við Jón Gunnar um málið. Sem ekki var fyrirliggjandi í fyrstu útgáfu.