Á móti lækkun kosningaaldurs

„Við í Hveragerði teljum að líta verði á málið í heild sinni. Ef 16 ára börn eiga að mega kjósa, á þá lögræðisaldur ekki að vera 16 ár líka?“ segir Unnur Þormóðsdóttir, formaður bæjarráðs Hveragerðisbæjar, um hugmyndir um lækkun kosningaaldurs úr 18 ára aldri í 16 ár.

„Ef 16 ára barn má taka sæti í sveitarstjórn þá þarf það nú eiginlega að vera fjárráða,“ segir Unnur jafnframt. Bæjarráðið segir í bókun að nauðsynlegt sé að þeir sem taki þátt í sveitarstjórnarmálum hafi lagalegu stöðu til að taka ákvarðanir fyrir hönd sveitarfélagsins, en séu ekki ófjárráða og heyri undir lög um barnavernd og forræði foreldra.