Barcelona ætlar að gera risatilboð í Coutinho

Barcelona hefur ekki gefist upp á að fá Philippe Coutinho frá Liverpool og ætlar að bjóða 133 milljónir punda í Brassann í janúar.

Liverpool hafnaði þremur tilboðum frá Barcelona í Coutinho síðasta sumar og hann endaði á því að vera áfram hjá Bítlaborgarliðinu.

Barcelona ætlar hins vegar að reyna aftur að fá Coutinho og samkvæmt Mundo Deportivo ætlar Katalóníufélagið að bjóða 133 milljónir punda í hann.

Ef félagaskiptin verða að veruleika verður Coutinho dýrasti leikmaður í sögu Barcelona og næstdýrasti leikmaður allra tíma á eftir landa sínum, Neymar.

Hinn 25 ára gamli Coutinho hefur skorað sjö mörk í 18 leikjum með Liverpool í vetur.