Costa má loks spila aftur

Diego Costa má snúa aftur á knattspyrnuvöllinn í næstu viku.

Spánverjinn var ekki hluti af áætlunum Antonio Conte hjá Chelsea og var hann því seldur til Atletico Madrid í september.

Costa hefur hins vegar ekkert mátt spila fyrir Madrid, því félagið er í félagsskiptabanni. Bannið rennur hins vegar sitt skeið um áramótin.

„Ég hef beðið lengi eftir þessum degi. Ég er orðinn þreyttur á að æfa og þarf að spila,“ sagði Costa.

Hann var formlega kynntur sem leikmaður Atletico í dag. Liðið mætir Lleida Esportiu í bikarleik á miðvikudaginn og þykir líklegt að Costa muni koma við sögu í þeim leik.