Maður tekinn með stuðbyssu á öldurhúsi á erilsamri nóttu lögreglu

Svo mikill erill var hjá lögreglunni á höfuðborgarsvæðinu í nótt að taka þurfti í notkun fangageymslur í lögreglustöðinni í Hafnarfirði til að koma öllum þeim sem voru handteknir fyrir. Á meðal þeirra sem var handtekinn var maður sem var tekinn á vínveitingastað með rafstuðbyssu.

Í dagbók lögreglunnar eftir nóttina kemur fram að allar fangageymslur hafi verið fullar og rúmlega það. Það heyri til undantekninga að opna þurfi fangageymslurnar í Hafnarfirði. Engin alvarleg mál komu þó upp og flest málin tengdust neyslu áfengis og vímuefna.

Starfsmaður í verslun í miðbænum tilkynnti um manninn með stuðbyssuna eftir að hann sá hann meðhöndlana hana inni í versluninni, samkvæmt upplýsingum lögreglunnar. Maðurinn er þó ekki sagður hafa notað hana til að hóta neinum beint. 

Þegar lögregla kom á vettvang var maðurinn farinn en lögreglumenn leituðu í nágrenninu. Fundu þeir manninn inni á bar þar sem lögreglan segir að ógæfumenn venji komur sínar. Rafstuðbyssan fannst á honum og einnig smáræði af fíkniefnum. 

Hann var handtekinn og vistaður í fangaklefa en hann þótti ekki skýrsluhæfur þar sem hann var undir áhrifum vímuefna. Maðurinn verður kærður fyrir brot á vopnalögum og fyrir vörslu fíkniefna.