Bjarni ósáttari við rauða spjaldið en ólöglega sigurmarkið | Sjáðu atvikin

„Ég fékk ekkert áfall eða neitt þannig þegar að ég sá þetta. Það er rosalega erfitt fyrir dómarana að sjá þetta en auðvitað eiga þeir ekki að hafa augu á boltanum heldur að fylgjast með hinum megin.“

Þetta segir Bjarni Fritzson, þjálfari ÍR, um sigurmark Vals í leik liðanna í Olís-deild karla í gærkvöldi sem var kolólöglegt eins og fjallað var um í morgun

ÍR-ingar fóru illa að ráði sínu í seinni hálfleiknum þar sem þeir náðu mest fjögurra marka forskoti en eftir spennandi lokamínútur unnu Valsmenn sterkan endurkomusigur.

„Það var svo margt sem gerðist á lokasekúndunum. Ég er búinn að horfa á leikinn aftur og Bergvin er bara óheppinn að skora ekki í síðustu sókninni okkar. Það er ansi mikið atast í honum þegar að hann fer í gegn en ekkert dæmt. Svo fá Valsmenn ansi ódýrt fríkast skömmu síðar,“ segir Bjarni sem kennir nú sínum mönnum aðallega um að bjóða upp á þetta sigurmark Vals.

„Þetta mark er bara mjög vel útfært hjá þeim en við á sama tíma frekar lélegir. Það er erfitt að kenna dómurunum um það. Þetta var smá reynsluleysi hjá okkur. Menn voru meira að horfa á nýja Japanann hjá Val heldur að fylgjast með leiknum,“ segir Bjarni léttur.

Óvænt að sjá mínútu dómarakennslu í hálfleik. #olisdeildin@Seinnibylgjanpic.twitter.com/BoihB4oCGt

— Dagur Sigurdsson (@DagurSigurdsson) October 12, 2017

Sigurmarkið segir Breiðhyltingurinn auðvitað svekkjandi en það var annað í dómgæslunni sem fór meira í taugarnar á honum. Hann fór til dæmis vel yfir málin í hálfleik með Sigurði Þrastarsyni, öðrum dómara leiksins, eins og sást á skemmtilegu myndbandi sem Dagur Sigurðsson birti á Twitter-síðu sinni.

„Ég tók ekkert kast eftir leikinn eða í hálfleik, alls ekki. Á þessu myndbandi sem „hlutlausi sérfræðingurinn“ tók var ég bara að krefjast svara um það sem gerðist í fyrri hálfleiknum,“ segir Bjarni.

Í fyrri hálfleiknum fékk Sveinn Andri Sveinsson, leikmaður ÍR, rautt spjald fyrir að fara í andlitið á Ými Erni Gíslasyni. Bjarna fannst Valsmenn brjóta alveg eins á ÍR-ingum fyrr í leiknum en sleppa með tvær mínútur.

Orri Freyr Gíslason fékk tvær mínútur fyrir að slá í andlit Bergvins snemma leiks og svo fékk Ólafur Ægir Ólafsson einnig tvær fyrir að fara aftan í skothönd Sveins Andra sem síðar fauk af velli.

„Orri er bara viljandi að reyna að slasa leikmanninn minn. Þetta er viljandi og á ekki að sjást. Ólafur rífur svo aftan í Svein Andra. Ég get verið sammála að þetta er allt rautt spjald eða tvær mínútur en það verður að vera einhver lína. Við vorum tilbúnir í slagsmál við Valsmennina og bökkuðum aldrei en þá verður að vera dæmt eftir einhverri línu,“ segir Bjarni Fritzson.

Atvikin þrjú sem um ræðir má sjá hér að neðan.