Eldur logaði út um glugga og dyr á húsi í Hörgársveit

Slökkviliðsmenn frá Akureyri unnu að því að ráða niðurlögum elds í íbúðarhúsi í Hörgársveit í Eyjafirði fram undir klukkan sex í morgun. Að sögn Ólafs Stefánssonar, slökkviliðsstjóra, logaði bæði út um glugga og hurðir þegar slökkvilið kom á vettvang. Húsið var mannlaust.

Eldurinn kviknaði um kl. 23 í gærkvöldi. Ólafur segir húsið gamalt og byggingarefnin í því þannig gerð að eldurinn hafi farið um allt hús. Slökkviliðsmenn þurftu að rífa ytri klæðningu af veggjum þess til að slökkva eldinn.

Þegar mest var börðust tíu menn á þremur slökkviliðsbílum við eldinn. Ferja þurfti vatn úr Hörgá með tankbíl.

Aðstæður til slökkvistarfs voru hins vegar góðar að sögn Ólafs og lauk aðgerðum á staðnum snemma í morgun.