Emil: Væri gaman að mæta Brasilíu

Emil Hallfreðsson viðurkennir að hann hafi ekki dreymt um að komast á HM þegar hann var að basla með íslenska landsliðinu fyrir ekki svo mörgum árum.

„Nei, í hreinskilni sagt. Þetta var svolítið langt frá manni. Þetta er ótrúlegt afrek,“ sagði Emil eftir sigurinn á Kósovó í kvöld. Hann segir að það sé meira afrek að komast á HM en EM.

„Ég myndi segja það. Við vinnum líka riðil með Tyrklandi, Króatíu og Úkraínu. Þetta er magnaður árangur.“

En var markmið Íslands að vinna riðilinn eða ná 2. sætinu og komast þannig í umspil?

„Annað sætið var aðeins raunhæfara en þegar leið á keppnina sáum við að við gátum tekið 1. sætið,“ sagði Emil sem er ánægður með hvernig íslenska liðið svaraði tapinu fyrir því finnska; með því að vinna síðustu þrjá leikina í undankeppninni með markatölunni 7-0.

„Það geta öll lið átt slæman dag og við hittum á slæman dag. Við vorum ákveðnir í að bæta upp fyrir það og vinna síðustu þrjá leikina,“ sagði Emil. En á hann sér einhverja óskamótherja á HM í Rússlandi?

„Það væri gaman að mæta Brasilíu,“ svaraði Emil.