Dísa Jakobs með tónleika á Græna hattinum

Eftir áralanga búsetu erlendis er Dísa Jakobsdóttir flutt aftur heim og fagnar nú útgáfu nýrrar breiðskífu, Reflections, með tónleikahaldi á Græna hattinum á Akureyri annað kvöld.

Titillag plötunnar, Reflections, hefur setið á topplistum Rásar 2 í sumar og því verður einstakt tækifæri að sjá hana flytja efni plötunnar þar sem ber við nýjan hljóm. Á plötunni leitast Dísa við að kalla fram ambient-áhrif sem vekja hughrif og draumkennt ástand.

Hennar helstu yrkisefni eru ferðalög hugans, lýsingar á draumum og myndrænum hlutum og því mega áhorfendur búast við einskonar andlegu hugarferðalagi. Dísa flytur tónlist nýju plötunnar í bland við eldra efni á tónleikunum annað kvöld.

Hljómsveitin sem kemur fram ásamt Dísu er skipuð: Helgi Svavar Helgason, trommur og Hannes Helgason, hljómborð, Karl James, fiðla.