Án sjúkratrygginga eftir að sýslumaður flutti lögheimilið til Kanada

Birgir Örn Breiðfjörð, íslenskur maður sem dvaldi í Kanada í þrjá mánuði í sumar vegna vinnu, er ekki lengur sjúkratryggður hér á landi þar sem sýslumaðurinn á höfuðborgarsvæðinu flutti lögheimili Birgis að honum forspurðum á meðan hann var erlendis.

Fyrst var greint frá málinu á vef RÚV en Birgir ræddi málið í Bítinu á Bylgjunni í morgun. Hann komst að því að búið var að færa lögheimilið hans þegar hann var að panta sér tíma hjá lækni á heilsugæslustöðinni.

„Þá benti þessi indæla starfskona í móttökunni mér á að ég væri ekki sjúkratryggður sem kom mér algjörlega á óvart. Þegar ég fer svo að rekja þetta eitthvað lengra þá kemur í ljós að ég var ekki með lögheimili hér lengur og að það hafði verið afskráð hjá sýslumanninum á höfuðborgarsvæðinu,“ segir Birgir.

Á meðan hann var í Kanada átti hann tíma hjá sýslumanni ásamt barnsmóður sinni þar sem verið var að ganga frá umgengnissamningi þeirra á milli vegna dóttur þeirra.

„Þar sem ég er staddur erlendis þá fæ ég lögmann til að mæta fyrir mína hönd og ganga frá því máli. Svo þegar ég mæti til baka til landsins þá er ég ekki skráður í landinu og hef því engin réttindi.“

Hann telur að starfsmaður hjá sýslumannsembættinu hafi fært lögheimilið en aðspurður segir hann lítið um svör varðandi það hvernig þetta gerðist eða hvenær þessu verði breytt til baka. Hann sé búinn allt sem hann getur en svörin sem hann fær er að málið sé í ferli hjá embættinu.

„Ég er í raun réttindalaus og ef ég ætla að sækja um einhverja þjónustu þá þarf ég bara að greiða fyrir hana eins og ég sé erlendur ríkisborgari,“ segir Birgir og bendir á að við þetta vakni spurningar um það hvort að hver sem er geti fært lögheimili manns án þess að maður samþykki það.

Hlusta má á við talið við hann í heild sinni í spilaranum hér fyrir neðan.