Irma heldur ótrauð áfram yfir Karíbahaf

Auknar líkur eru nú taldar á að fellibylurinn Irma nái landi á meginlandi Bandaríkjanna um helgina eða byrjun næstu viku. Fellibylurinn hefur þegar valdið eyðileggingu á eyríkjum í Karíbahafi og þokast áfram í vesturátt.

Irma gekk fyrst á land á Antígva og Barbúda sem liggja á mörkum Karíba- og Atlantshafsins í gærkvöldi. Forsætisráðherrann þar hefur sagt að gríðarleg eyðilegging hafi átt sér stað. Einn er sagður hafa farist.

Næst gekk fellibylurinn yfir frönsku yfirráðasvæðin St. Martin and St. Barthélemy. Frönsk yfirvöld segja að mikil eyðilegging hafi átt sér stað þar. Emmanuel Macron, forseti, sagði að mannskaða væri að vænta af völdum Irmu. Tveir eru þegar sagðir hafa farist á eyjunum.

Hard to believe we've been able to generate loops like this 3 days in a row. Center of powerful #Irma just north of Puerto Rico. #GOES16 pic.twitter.com/QhVRgzkSYu

— NASA SPoRT (@NASA_SPoRT) September 6, 2017

Meira en hálf milljón án rafmagns á Púertó Ríkó

Veðurfræðingar hafa fylgst grannt með ferðum og þróun Irmu en hún er talin fimmta stigs fellibylur sem er öflugasti flokkur fellibylja sem er skilgreindur út frá vindstyrk.

Samfelldur vindurinn í Irmu hefur mælst um 82 m/s, að því er segir í frétt BBC. Hún er öflugasti fellibylur sem myndast hefur í Atlantshafi frá því að athuganir hófust og næstöflugasti fellibylur sem gengið hefur á land á jörðinni frá því að slíkar mælingar byrjuðu.

Í stöðuuppfærslu Veðurstofu Bandaríkjanna vegna Irmu sem var gefin út kl. 21 að íslenskum tíma var varað við að íbúar í Púertó Ríkó væru í lífshættu vegna veðurofsans, sjávarflóða og úrkomu í nótt.

Útlit var þó fyrir að auga stormsins færi ekki yfir Púertó Ríkó nú í kvöld. Engu að síður segir The Guardian að fleiri en 600.000 manns séu án rafmagns þar og nærri því 50.000 án drykkjarvatns.

Á morgun muni sama hætta verða á ferðum á norðurstönd Hispanjólu og svo á Turks- og Caicoeyjum og suðaustanverðum Bahamaeyjum á morgun og föstudag.

Myndbandið hér fyrir neðan var tekið úr Alþjóðlegu geimstöðinni á braut um jörðu í dag, 6. september, þegar Irma gekk á land á eyjum í Karíbahafi.

Bandaríska utanríkisráðuneytið skipaði starfsmönnum sínum á Bahamaeyjum að yfirgefa eyjarnar áður en Irma gengur á land þar. Það hefur einnig varað Bandaríkjamenn við því að ferðast til Karíbahafsins.

Veðurstofa Bandaríkjanna sagði einnig í stöðuuppfærslu sinni að meiri líkur væru nú á því að Irma gangi á land í Flórída um helgina eða í byrjun næstu viku. Strax ætti að byrjað að fylgjast með fellibylnum á Florida Keys-rifjunum sunnan af meginlandinu og á Flórídaskaga sjálfum á morgun, fimmtudag.

Donald Trump Bandaríkjaforseti hefur lýst yfir neyðarástandi á Flórída, Jómfrúareyjum og á Púertó Ríkó vegna Irmu.

Þrír fellibyljir samtímis í Atlantshafi

Tveir aðrir fellibyljir eru nú í Karíba- og Atlantshafi auk Irmu. Það er í fyrsta skipti frá árinu 2010 sem slíkt gerist. Hitabeltisstormarnir Katia og José náðu styrk fellibylja í dag. Katia er í Mexíkóflóa en José yfir rúmsjó yfir Atlantshafi, austur af Karíbahafi.

CNN segir að ekki sé búist við að José fylgi sömu slóð og Irma að svo stöddu. Hann gæti þó vaxið upp í þriðja stigs fellibyl yfir Atlantshafi.

Spáð er að Katia haldi sig nærri ströndum Mexíkó og hafa byggðir á hluta strandlengjunnar þar fylgst með framvindu hennar vegna mögulegra áhrifa fellibyljarins.

Stunning photo from a US Air Force Reserve Hurricane Hunters plane shows the sun over the "stadium effect" created by Hurricane #Irma's eye. pic.twitter.com/7ys7bT06of

— NBC Nightly News (@NBCNightlyNews) September 6, 2017