Flottar endurkomur hjá bæði Þrótturum og Haukum í kvöld | Myndir

Þróttur og Haukar unnu karaktersigra í Inkasso deild karla í fótbolta í kvöld en liðin lentu bæði undir í sínum leikjum.

Þróttarar minnkuðu forskot Keflavíkur á toppnum í eitt stig í kvöld en í hálfleik stefndi í það Keflvíkingar væru að fara að stinga af á toppnum. Hefðu leikirnir endað í hálfleik þá væri Keflvíkingar með sjö stiga forskot en margt breyttist í seinni hálfleiknum.

Þróttarar komu til baka og unnu 2-1 sigur á HK og Keflvíkingar misstu niður tveggja marka forskot á Ásvöllum og töpuðu 4-2 á móti heimamönnum í Haukum.

Anton Brink, ljósmyndari Vísis og Fréttablaðsins, var á leiknum í Laugardalnum og náði þessum myndum hér fyrir neðan.

Keflavík er nú með 34 stig, Þróttarar hafa 33 stig og svo koma Fylkir og Haukar í næstu sætum með 30 stig. Fylkismenn eiga leik inni á móti Leikni F. á morgun.

Viktor Jónsson skoraði sigurmark Þróttara á móti HK átta mínútum fyrir leikslok en HK-ingar voru fyrir leikinn búnir að vinna fimm leiki í röð.

Brynjar Jónasson kom HK í 1-0 rétt fyrir hálfleik en Rafn Andri Haraldsson jafnaði metin. Þróttarar voru betri og áttu skilið að skora sigurmarkið sem kom með laglegum skalla frá Viktori á 82. mínútu.

HK sótti samt undir lokin og þá þurfti ótrúlega markvörslu hjá Arnari Darra Péturssyni í uppbótartíma til að tryggja Þrótturum sigurinn.  

Keflvíkingar voru 2-0 yfir á móti Haukum þegar 50 mínútur voru liðnar af leiknum en þá komu þrjú Haukamörk á þrettán mínútum. Haukarnir bættu svo einu marki við undir lokin og unnu 4-2 sigur. Björgvin Stefánsson skoraði tvö af mörkum Hauka í kvöld.

Haukarnir hafa nú náð í 17 stig af 1 mögulegu í síðustu sjö deildarleikjum og eru núna aðeins þremur stigum frá sæti sem gefur þátttökurétt í Pepsi-deildinni á næstu leiktíð.



Upplýsingar um markaskorara eru fengnar frá fótbolti.net.



Úrslit og markaskorarar í Inkasso deild karla í kvöld:

Þór Ak - Fram 2-2

1-0 Kristján Örn Sigurðsson (19.), 1-1 Guðmundur Magnússon (33.), 2-1 Gunnar Örvar Stefánsson (48.), 2-2 Ivan Bubalo (76.).

Þróttur - HK 2-1

0-1 Brynjar Jónasson (42.), 1-1 Rafn Andri Haraldsson (59.), 2-1 Viktor Jónsson (82)

Haukar - Keflavík 4-2

0-1 Sjálfsmark (5), 0-2 Jeppe Hansen , víti (48.), 1-2 Harrison Hanley (54.), 2-2 Björgvin Stefánsson (60.), 3-2 Aron Jóhannsson (67.), 4-2 Björgvin Stefánsson (81.)