Hreiðar ver mark Gróttu næstu tvö árin

Markvörðurinn Hreiðar Levý Guðmundsson hefur skrifað undir tveggja ára samning við Gróttu.

Hreiðar, sem er 36 ára, lék með Halden í Noregi á síðasta tímabili. Hann hafði ætlað sér að spila með KR í vetur og var búinn að skrifa undir samning við uppeldisfélag sitt. En handknattleiksdeild KR var svo lögð niður eins og frægt er orðið.

Hreiðar lék á sínum tíma með Gróttu/KR. Hann hefur einnig leikið með ÍR, KA og Akureyri hér á landi. Þá lék markvörðurinn sem atvinnumaður í Svíþjóð, Þýskalandi og Noregi.

Hreiðar hefur leikið 146 A-landsleiki og var íslenska liðinu sem vann til silfurverðlauna á Ólympíuleikunum 2008 og bronsverðlauna á EM tveimur árum síðar.

Auk þess að verja mark Gróttu mun Hreiðar stýra þjálfun yngri markvarða félagsins.

Grótta endaði í 8. sæti Olís-deildarinnar á síðasta tímabili og tapaði fyrir FH í 8-liða úrslitum úrslitakeppninnar.

Í sumar hafa sterkir leikmenn yfirgefið Gróttu og þá hætti þjálfarinn Gunnar Andrésson. Kári Garðarsson tók við starfi hans en undanfarin ár hefur hann gert frábæra hluti með kvennalið Gróttu.