Ólafía Þórunn: Ég er mun sterkari spilari en í byrjun árs

Júlímánuður hefur verið flottur hjá íslenska atvinnukylfingnum Ólafíu Þórunni Kristinsdóttur. Hún hefur komist í gegnum niðurskurðinn á öllum þremur LPGA-mótunum sínum og náði sínum besta árangri á bandarísku mótaröðinni þegar hún tryggði sér þrettánda sætið á opna skoska í gær. Þrettánda sætið var ekki aðeins besti árangur hennar á LPGA heldur fleytti það henni einnig inn á opna breska risamótið sem verður um verslunarmannahelgina.

„Ég toppa greinilega alltaf í júlí,“ sagði Ólafía Þórunn hlæjandi um þá staðreynd hversu vel henni gekk í þessum mánuði í ár, en í júlí í fyrra vann hún Íslandsmótið á metskori.

„Þetta var mjög erfiður dagur og ég veit ekki hvað er ekki búið að vera í gangi. Það var allt á eftir áætlun síðan í morgun og alls konar áskoranir. Ég er mjög ánægð að hafa höndlað þetta allt svona vel,“ sagði Ólafía Þórunn.

Ólafía lenti í ýmsu mótlæti á mótinu í Skotlandi en það var aðdáunarvert hversu vel henni gekk að koma til baka eftir áföllin. Gott dæmi um það er að hún fylgdi þreföldum skolla á fyrsta hring eftir með tveimur fuglum á síðustu fimm holunum.

Má ekki verða reið

„Ég verð bara að vera þolinmóð og ekki vera reið, sérstaklega þar sem að það getur bara allt gerst í svona vindi. Stundum gerast fáránlegustu hlutir og ég var mjög sterk í að vinna mig út úr því þessa vikuna,“ sagði Ólafía Þórunn.

Þrjú efstu sætin á opna skoska skiluðu þátttökurétti á opna breska en þá erum við að tala um þá kylfinga sem voru ekki þegar búnir að tryggja sig inn.

„Þetta er bara geggjað og mjög stór áfangi,“ sagði Ólafía Þórunn sem keppti fyrst Íslendinga á risamóti í júní þegar hún tók þátt í PGA-meistaramótinu í Illinois.

„Umgjörðin í kringum þessi mót er miklu stærri, það eru fleiri áhorfendur og þar af leiðandi meiri truflanir. Svo þarf líka að halda væntingunum niðri og verða ekki of spennt,“ sagði Ólafía Þórunn sem var að klára sitt fimmtánda LPGA-mót um helgina. „Ég er klárlega búin að læra mikið á þessum mótum sem ég er búin með. Ég er mun sterkari spilari en í byrjun árs þökk sé reynslunni,“ sagði Ólafía Þórunn. Veðrið var erfitt.

Ekta íslenskar aðstæður



„Það var ískalt stundum og svo kom allt í einu sól og þá var maður að fara úr öllu. Það var mjög tilviljunarkennt veður en oftast var nú kalt, rigning og vindur. Þetta var ekta íslenskt en aðeins meiri vindur kannski því hann var mjög sterkur,“ sagði Ólafía Þórunn.

„Spennan var ekki meiri fyrir mig en samt töluðu allir í kringum mig eins og þetta væri komið. Það er svolítið óþægilegt því ég vil ekki segja að þetta sé komið fyrr en það er komið. Ég þarf að einbeita mér áfram og þurfti því að loka á það. Ég var ekki að hugsa um þetta heldur bara að reyna að spila eins vel og ég gat,“ sagði Ólafía Þórunn.

„Í dag fannst mér ég ekki spila vel. Ef ég spila einn yfir pari þegar ég er ekki að spila vel þá er ég mjög ánægð. Það er ekki verra en það. Þetta var mjög stöðugt í dag þó að ég hafi verið einn yfir. Ég missti eiginlega öll parfærin mín. Ef ég hefði bara sett helminginn af þeim í þá hefði ég spilað undir pari. Það féll ekkert af þeim niður,“ sagði Ólafía Þórunn.

Svo fer ég bara að sofa

Hún náð tvisvar að svara skolla með fugli og var því fljót að bæta fyrir mistökin.

„Það er barátta í manni,“ sagði Ólafía Þórunn kát en þreytt. Næst á dagskrá var að koma sér yfir á hina strönd Skotlands: „Svo fer ég bara að sofa og hvíla mig,“ sagði Ólafía Þórunn að lokum.