Juventus og Roma skildu jöfn í Massachusetts

Ítölsku stórveldin, Roma og Juventus, skildu jöfn á ICC-bikarnum í Bandaríkjunum í kvöld, en leikið var á Gillette-leikvanginum í Massachusetts.

Mario Mandzukic kom Juventus yfir á 29. mínútu, en króatíski landsliðsmaðurinn lék þá á Alisson Becker í marki Roma og skoraði í autt markið.

Staðan var 1-0 í hálfleik og allt þangað til á 74. mínútu þegar Edin Dzeko jafnaði metin með auðveldu skoti úr teignum eftir frábæra fyrirgjöf Aleksandar Kolarov.

Lokatölur urðu 1-1, en bæði lið leyfðu mörgum leikmönnum að spreyta sig eins og vanin er í þessum æfingarleikjum. Þegar leikirnir enda jafntefli í þessu móti er gripið til vítaspyrnukeppni, en þar hafði Juventus betur.

Roma endaði mótið með fimm stig; einn sigur og tvö jafntefli, en Juventus með þrjú stig; einn sigur, eitt tap og eitt jafntefli.

Ítalska deildin hefst um miðjan ágúst, en Juventus mætir Cagliari í fyrstu umferðinni á meðan Roma spilar við Atalanta.