Aukin hætta á jökulhlaupi í Múlakvísl

Aukin hætta er nú á jökulhlaupi í Múlakvísl á Mýrdalssandi. Frá þessu er greint á vef Veðurstofu Íslands en þar segir:

„Undanfarna daga hefur rafleiðni í Múlakvísl farið jafnt og þétt hækkandi og mælist nú um 290 µS/cm. Það bendir til þess að óvenjumikið jarðhitavatn sé í ánni, sem bendir til aukinnar hættu á jökulhlaupi. Lögreglumenn á vettvangi hafa staðfest að óvenju mikið rennsli sé í ánni og fylgst er náið með frekari hættumerkjum.“

Í tilkynningu frá Veðurstofunni segir svo:

„Leiðnimælingar segja til um magn jarðhitavatns í ánni og þegar hlaup af jarðhitavöldum eru í uppsiglingu tekur leiðnin í ánni að stíga. Leiðniaukningin getur varað jafnvel í nokkra daga áður en sjálft hlaupið hefst.

Allmörg hverasvæði eru þekkt undir Mýrdalsjökli. Sírennsli er frá þessum svæðum og fer það eftir landslaginu á hverjum stað hvort bræðsluvatnið safnast fyrir eða ekki.

Misjafnt er hversu mikið vatn safnast fyrir í þessum lónum áður en hleypur úr þeim og einnig hversu hratt þau tæmast.

Rafleiðni mælist nú um 290 μS/cm og er stöðug eins og er.

Aukið rennsli er í ánni skv. viðbragðsaðilum á vettvangi en ekki eru merki um að hlaup sé hafið. Vatnamælar við jökulinn gefa skýrt til kynna ef hlaup hefst. Veðurstofan fylgist grannt með gangi mála og Almannavarnir og Vegagerðin eru meðvituð um hættuna.“