Hátt settir stafsmenn Barclays í Bretlandi ákærðir fyrir fjársvik og ólöglega ráðgjafagreiðslu

Bankinn Barclays PLC í Bretlandi, ásamt fjórum fyrrum stjórnendum bankans, hefur verið ákærður fyrir áform um fjársvik ásamt því að fá ólöglega fjárhagsaðstoð. Ákæran kemur í kjölfar fimm ára rannsóknar sem tengdist fjáröflun fyrirtækisins frá Qatar í júní og nóvember árið 2008. BBC greinir frá.

Hátt settir starfsmenn bankans ásamt forstjóra bankans eru sakaðir um að hafa greitt fé fyrir ráðgjöf frá Qatar ásamt því að hafa veitt Qatar fyrirframgreitt tveggja milljarða punda lán eftir að búið var að semja um fjáröflunina. Stjórnarmeðlimir bankans hafi því beinlínis greitt Qatar hluta af því fjármagni sem átti að fara til bankans.

Hvattir til að styrkja bankann

Rannsóknarnefnd fjársvika hefur því meðal annars rannsakað hvort að greiðsla bankans til Qatar á þessum tíma hafi verið einskonar hvatning til þess að styrkja bankann en samtals fékk bankinn 7 milljarða punda frá Qatar árið 2008. Þessi fjárhæð gerði Barclays kleift að komast undan því að ríkið skipti sér af málefnum hans á tímum kreppunnar.

Fyrrum forstjóri bankans John Varley er einn þeirra fjögurra sem mun mæta fyrir dóm í London þann 3 júlí næstkomandi. Hann hafið unnið sem forstjóri bankans í sex ár. Þeir Roger Jenkins, Thomas Kalaris, fyrrum framkvæmdarstjóri eignadeildar bankans og Richard Boath, fyrrum framkvæmdarstjóri Evrópudeildar bankans, hafa einnig allir hlotið ákæru fyrir áform um fjársvik í fjáröfluninni í júní 2008. Að auki hafa Varley  og Jenkins verið ákærðir fyrir áform um fjársvik í fjáröfluninni í lok árs 2008.

Lögfræðingur Jenkins, Brad Kaufman, hefur tjáð sig um málið og segir að hann muni halda uppi sterkum vörnum fyrir skjólstæðing sinn. Hann nefndi að Jenkins hefði á þessum tíma sótt ráðgjöf hjá lögfræðingum, erlendis sem og í Bretlandi, varðandi þau málefni er vörðuðu fjáröflun fyrirtækisins á þessum tíma.