Leiðir skilja hjá Toyota og Tesla

Bílaframleiðandinn Toyota hefur slitið samstarfi sínu við rafmagnsbílafyrirtækið Tesla en fyrirtækin höfðu verið í samstarfi um þróun rafbíla. Stefnir Toyota á að hefja sína eigin þróun á rafbílum.

Toyota seldi öll hlutabréf sín í Tesla í desember á síðasta ári en þeir áttu um þriggja prósenta hlut í fyrirtækinu. Hlutinn keypti þeir árið 2010 á í kringum 50 milljónir Bandaríkjadollara.

Fyrirtækin höfðu svo frá árinu 2012 unnið að því að þróa rafbíla en nú skiljast leiðir.

„Samstarfi okkar lauk fyrir nokkru síðan og þar sem það hafa ekki verið neinar frekari þróanir frá þeim tíma ákváðum við að selja alla hluta okkar í fyrirtækinu“ sagði Ryo Sakai, talsmaður Toyota, um málið í samtali við Reuters.

Hyggst japanski bílaframleiðandinn nú hefja þróun á sínum eigin rafbílum en það ku vera hluti af viðleitni fyrirtækisins til að takast á við sífellt strangari alþjóðlegar reglur um útblástur bíla.