Vilja að Íslendingar skipuleggi Color Run á hinum Norðurlöndunum

Næstkomandi laugardag fer litahlaupið fram í miðbæ Reykjavíkur og er gert ráð fyrir að rúmlega 10.000 manns taki þátt í skemmtuninni.

„Þessi mikla aðsókn Íslendinga í litahlaupið á svo sem ekkert að koma okkur á óvart. Hefðbundinn fjöldi þátttakenda í hlaupum í stórborgum víðsvegar um heiminn er á bilinu fimm til sex þúsund manns, það telst vera góð þátttaka,“ segir Davíð Lúther Sigurðarson, framkvæmdastjóri The Color Run á Íslandi.

„Við setjum hins vegar met í öllu sem við tökum okkur fyrir hendur og það að ná meira en 10.000 manns á litla Íslandi hefur vakið athygli á meðal erlendra aðila og hefur The Color Run fyrirtækið leitað til okkar sem stöndum að hlaupinu hér á landi með ósk um að taka við skipulagningu litahlaupsins í Danmörku, Noregi, Finnlandi og Færeyjum.“

Davíð segir að þau hafi haldið eitt hlaup í Kaupmannahöfn í maí og eru að skoða með hlaup á fleiri stöðum á næstunni.

Fimm kílómetra skemmtun

„Það hefur verið leitað til okkar frá Færeyjum varðandi að koma með hlaupið þangað. Við erum mjög spenntir fyrir því og hver veit nema að það verði litahlaup þar áður en langt um líður.”



The Color Run er 5 km löng skemmtun fyrir alla fjölskylduna þar sem þátttakendur eru litaðir með litapúðri eftir hvern kílómetra og við endamarkið verður síðan mikil fjölskylduskemmtun með tilheyrandi litadýrð.

Aðeins nokkur hundruð miðar eru eftir í litahlaupið og stefnir allt í að uppselt verði þriðja árið í röð.

„Það er frábært að sjá áhuga landans að taka þátt í skemmtun sem felur í sér þessa hreyfingu sem hlaupið er, hvort sem fólk hleypur, skokkar eða labbar þessa fimm kílómetra. Við vitum fyrir víst að meirihluti þeirra sem hafa tekið þátt á undanförnum árum eru að taka þátt í skipulögðu hlaupi í fyrsta sinn á ævinni og ennþá betra að heyra þegar þátttakan í The Color Run hefur orðið til þess að fólk hefur bætt skokkinu í sitt daglega líf,” segir Davíð.

Á mánudag opnaði The Color Run búðin í verslun Under Armour í Kringlunni og eru þátttakendur hvattir til að sækja hlaupagögn sín fyrr heldur en síðar. Búðin opnar daglega klukkan 10 og er opin til 18.30 á miðvikudag og til kl. 22 á fimmtudag og föstudag. Auk hlaupagagna má versla ýmiskonar litahlaupsvarning í búðinni til að gera upplifun af hlaupinu enn ánægjulegri.