Ráðist á íslenska stúlku í Búlgaríu

Íslenskri stúlku var nauðgað í Búlgaríu í síðustu viku þar sem hún var með hópi útskriftarnema frá Verzlunarskóla Íslands. Morgunblaðið greindi frá þessu í gærkvöldi.

Samkvæmt heimildum fréttastofu gerðist árásin með þeim hætti að stúlkan var numin brott af leigubíl og síðan brotið gegn henni. Árásarmaðurinn er erlendur.

Hópurinn var í útskriftaferð sem skipulögð var af ferðaskrifstofunni Tripical og dvaldist hópurinn í Burgas, sem er við strandsvæðið Sunny Beach. Hluta hópsins, sem telur um 230 manns, var tilkynnt um árásina og eftir því sem fréttastofa kemst næst er stúlkan komin aftur til landsins en ferðaskrifstofan gekkst fyrir því að svo gæti orðið þá þegar.

Uppfært klukkan 10:15

Ingi Ólafsson, skólastjóri Verzlunarskólans, hafði ekki heyrt um málið þegar Vísir ræddi við hann í gær, sagði hópinn ekki á vegum skólans í þeim skilningi. Um væri að ræða ungt fólk sem væri útskrifað. „Við höfum ekkert um þessa ferð að segja þannig. Enginn starfsmaður skólans er með í ferðinni," sagði Ingi í gær. En lét það jafnframt fylgja sögunni að þau í skólanum reyndu að fylgjast með hópnum og væru í góðum samskiptum við sína fyrrum nemendur.

Vísir reyndi ítrekað í allan gærdag að ná tali af þeim yfirlögregluþjónum Grími Grímssyni og Friðriki Smára Björgvinssyni vegna málsins en án árangurs.

Vísir ræddi við Styrmi Elí Ingólfsson hjá Tripical í gær og svo aftur í morgun. En Styrmir Elí er jafnframt fyrrverandi formaður nemendafélagsins í Verzlunarskólanum. Hann ítrekaði að stefna fyrirtækisins væri trúnaðar við viðskiptavini og hann gæti ekkert tjáð sig um málsatvik sem sneru að einstökum farþegum. Styrmir Elí sagði þó að engin kæra hafi verið lögð fram vegna neinna mála þar ytra.

Ferðin er mjög farin að styttast í annan endann og er von á hópnum til Íslands innan tíðar.