Oddaleikur er enginn venjulegur leikur

Spennustigið, varnarleikurinn og markvarslan. Allt mjög mikilvægir þættir á úrslitastundu í handboltanum og munu því skipta miklu máli í Kaplakrika klukkan 16.00 á morgun þegar FH tekur á móti Val í hreinum úrslitaleik um Íslandsmeistaratitilinn í Olís-deild karla.

Heimaliðið á enn eftir að vinna leik í úrslitaeinvíginu en leikurinn á morgun verður allt öðruvísi leikur en þeir fjórir sem búnir eru. Á morgun er enginn morgundagur, úrslitastund fyrir tvö jöfn lið sem hafa boðið upp á mikla skemmtun í lokaúrslitunum til þessa. Markatalan er 107-106 fyrir Val eftir fjögurra klukkutíma leik sem segir margt um hversu litlu munar á þessum tveimur bestu handboltaliðum landsins.

Það verða mörg mikilvæg stríð háð úti um allan völl og þótt liðsheildin skipti vissulega mestu máli í þessum leik þá mun frammistaða einstakra lykilmanna vega mjög þungt.

Oddaleikurinn um titilinn er enginn venjulegur leikur og enginn leikmaður á vellinum á morgun þekkir það að vinna slíkan leik. Tveir í Valsliðinu voru hins vegar með þegar liðið tapaði oddaleik um titilinn í Hafnarfirði 2010 en það eru fyrirliðinn Orri Freyr Gíslason og markvörðurinn Hlynur Morthens. Óskar Bjarni Óskarsson, annar þjálfari Valsliðsins í dag, stýrði Valsliðinu á Ásvöllum þennan laugardag í maí 2010.

Á móti kemur að Valsmenn hafa alltaf verið bestir á úrslitastundu í vetur og þeir hafa þegar unnið einn oddaleik á útivelli í þessari úrslitakeppni sem var á móti ÍBV í Vestmannaeyjum í 8 liða úrslitunum.

FH-ingar voru búnir að vinna sex heimaleiki í röð og höfðu ekki tapað og unnið 8 af 9 heimaleikjum sínum á árinu 2017 þegar þeir komu inn í lokaúrslitin á móti Val en hafa ekki verið líkir sjálfum sér í leikjunum í Kaplakrika. Nú er síðasti möguleikinn til að sýna sitt rétta andlit á sínum heimavelli.

Fréttablaðið fór yfir hverja leikstöðu fyrir sig og mat frammistöðu manna í úrslitaeinvíginu til þessa. Það er í höndunum á einhverjum af þessum leikmönnum að gera útslagið á úrslitastundu í Krikanum á morgun.

Vinstri hornamenn

Vignir Stefánsson, Val 13 mörk (52%)  

Arnar Freyr Ársælsson, FH 10 mörk (63%)

Hægri hornamenn

Sveinn Aron Sveinsson, Val 14 mörk (64%)

Óðinn Þór Ríkharðsson, FH 10 mörk (43%)

Línumenn

Orri Freyr Gíslason, Val 11 mörk (69%)

Ágúst Birgisson, FH 7 mörk (64%)

Markverðir

Birkir Fannar Bragason, FH 36 varin (35%)

Ágúst Elí Björgvinsson, FH 13 varin (25%)  

Sigurður I. Ólafsson, Val 32 varin (34%)

Hlynur Morthens, Val 15 varin (25%)  

Vinstri skyttur

Ásbjörn Friðriksson, FH

20 mörk (63%) og 9 stoðsendingar

Josip Juric Grgic, Val

13 mörk (52%) og 10 stoðsendingar

Hægri skyttur

Einar Rafn Eiðsson, FH

19 mörk (58%) og 12 stoðsendingar

Ólafur Ægir Ólafsson, Val

11 mörk (52%) og 13 stoðsendingar

Leikstjórnendur

Gísli Kristjánsson, FH

27 mörk (73%) og 15 stoðsendingar

Anton Rúnarsson, Val

14 mörk (52%) og  9 stoðsendingar

Varnarleikurinn

Varnarleikur Valsmanna hefur verið þeirra aðall í allan vetur og hann er aldrei betri en á erfiðum útivöllum. Hvort síðasti leikur var slys eða táknmynd þess að þreyta sé komin í liðið eftir mikið álag verður að koma í ljós.

Bekkurinn

Valsmenn hafa verið að fá meiri framlög frá bekknum í leikjunum til þessa í úrslitaeinvíginu en þjálfarar Valsliðsins hafa byggt upp frábæra breidd í vetur.

Staður og stund

FH-ingar eru á heimavelli, þeir unnu sannfærandi sigur á Val í síðasta leik og þjálfari liðsins hefur unnið oddaleik um titilinn bæði sem leikmaður og þjálfari.