Ólafía Þórunn í erfiðri stöðu eftir fyrsta hringinn á Hawaii

Ólafía Þórunn Kristinsdóttir fann sig ekki á fyrsta degi Lotte/​Hershey-mótsins í golfi sem fer fram á Hawaii. Þetta er fimmta mótið sem Ólafía tekur þátt í á LPGA-mótaröðinni.

Ólafía lék hringinn á fjórum höggum yfir pari. Hún fór afar illa af stað en hún fékk tvo skolla og einn tvöfaldan skolla á fyrstu fimm holunum.

Ólafía fékk tvo fugla og tvo skolla á síðustu 13 holunum og endaði á fjórum höggum yfir pari.

Ólafía er í 131.-136. sæti af 143 kylfingum og því er ljóst að hún þarf að spila mun betur á öðrum hringnum til að komast í gegnum niðurskurðinn.

Mi Hyang Lee frá Suður-Kóreu og Paula Creamer frá Bandaríkjunum eru efstar og jafnar á sex höggum undir pari.