Unnu öll fjögur undanúrslitaliðin á síðustu 56 dögum en eru nú úr leik

Karlalið ÍBV í handbolta hefur lokið leik í vetur en Eyjamenn töpuðu fyrir Valsmönnum, 26-27, í oddaleik í 8-liða úrslitum Olís-deildar karla í dag.

Þetta eru mikil vonbrigði fyrir ÍBV enda var mikið lagt í liðið í ár og sterkir leikmenn fengnir til Eyja.

ÍBV var í vandræðum fyrir áramót en fór svo á mikið flug eftir HM-fríið. Eyjamenn unnu níu af 11 leikjum sínum eftir áramót og virtust til alls líklegir.

Eyjamenn unnu m.a. öll fjögur liðin sem nú eru komin í undanúrslit eftir 17. febrúar og það með samtals 22 marka mun eða 5,5 mörkum að meðaltali í leik.

Þeir unnu sjö marka sigur á Aftureldingu (31-24), níu marka sigur á FH (30-21), fimm marka sigur á Fram (30-25) og eins marks sigur á Val (30-29).

Öll þessi lið eru hins vegar komin í undanúrslitin en ÍBV situr eftir með sárt ennið.

Sigrar ÍBV á undanúrslitaliðunum í síðustu umferðunum Olís-deildarinnar:

Lau. 18. feb. Fram - ÍBV 25-30 (12-15), Framhús

Sun. 5. mars Afturelding - ÍBV 24-31 (14-17), Varmá

Fim. 9. mars ÍBV - FH 30-21 (14-13), Vestmannaeyjar 

Þri. 4. apríl Valur - ÍBV 29-30 (19-12), Valshöllin