Viðskipti erlent

Fara ótroðnar slóðir með íslenskan bjór á dælum utan á gámi

Kolbeinn Tumi Daðason skrifar
Teikning Sam Wood af gámnum, eins og hann mun koma til með að líta út.
Teikning Sam Wood af gámnum, eins og hann mun koma til með að líta út. Sam Wood
Bjóráhugafólk á Íslandi á von á öðruvísi sendingu af bjór til landsins í sumar. Maine Brewers’ Guild á Austurströnd Bandaríkjanna og Eimskip hafa efnt til samstarfs sem felur í sér öðruvísi tegund flutninga á öli milli landa. Gámur, fullur af bjór og með utanáliggjandi dælum.

 Um málið er fjallað í fjölmiðlum í Maine en hugmyndin er að kynna bjór frá Maine á nýjum mörkuðum og um leið að fá íslenskan bjór á bandarískan markað.

 Sean Sullivan, framkvæmdastjóri hjá Maien Brewers’ Guild, segir verkefnið ekki auðvelt, alls ekki ódýrt og ekki sé verið að apa eftir neinum. Verið sé að fara ótroðnar slóðir. 

 Bjórframleiðendur í Maine vilji vera á undan tískunni og komast á evrópskan markað þar sem bjórþyrstir Evrópubúar vilja í auknum mæli drekka bandarískan bjór.

Áfangastaðir Eimskipa eru á fimmta tug og ætla bjórframleiðendur í Maine að nýta skipin til að breiða út fagnaðarerindið um bjórinn sinn.
„Amerískur bjór er sjóðandi heit vara í Evrópu sem Evrópubúar sækja af ákafa í,“ segir Sullivan.

Gámurinn, sem nefndur er bjórbox (e. beer box), verður fullur af bjórkútum frá bruggverksmiðjum héðan og þaðan í Maine. Hans fyrsti viðkomustaður verður bjórhátíð í Reykjavík þann 24. júní.

Í framhaldinu verður bjórboxið, ef að líkum lætur með tómum bjórkútum, fyllt á nýjan leik en nú með íslenskum bjór. Íslenskt öl verður teigað á bjórhátíð í Portland í Maine í lok júlí.

Markmiðið er svo að halda áfram útbreiðslu bjórs í Maine í þeim borgum sem Eimskip flytur vörur til. Þær eru á fimmta tug og má sjá á kortinu hér að ofan sem fengið er af vefsíðu Eimskipa.



Mest lesið


Fleiri fréttir

Sjá meira


×

Mest lesið