Þjálfara Fram var ráðið frá því að taka við liðinu

Guðmundur Helgi Pálsson, þjálfari Fram, segir að sér hafi verið ráðið frá því að taka við liðinu í sumar.

Fram missti bróðurpartinn úr sínum leikmannahóp í sumar auk þess sem þjálfarinn Guðlaugur Arnarsson hætti. Reynir Þór Reynisson tók við en entist aðeins nokkrar vikur í starfi. Þá kom Guðmundur Helgi til skjalanna og tók við Fram-liðinu sem hann lék með á sínum tíma.

„Ég talaði við nokkra fyrir þetta og menn voru á því að ég ætti ekki að láta slag standa. En ég leit á þetta sem áskorun, lét vaða og sé ekki eftir því í dag,“ sagði Guðmundur Helgi í samtali við Guðjón Guðmundsson í kvöldfréttum Stöðvar 2.

Fram var spáð neðsta sæti deildarinnar og flestir voru á því að liðið myndi ekki ná í mörg stig í vetur. En sú varð ekki raunin því hið unga lið Fram bjargaði sér frá falli í næstsíðustu umferð Olís-deildarinnar og endaði að lokum í 6. sæti eftir góðan endasprett. Fram mætir Íslandsmeisturum Hauka í 8-liða úrslitum um Íslandsmeistaratitilinn.

„Við tókum inn unga leikmenn og nýttum það sem til var. Þetta eru flottir strákar sem hafa lagt sig 100% fram. Þegar menn gera það og hafa gaman að er hægt að gera fullt af góðum hlutum,“ sagði Guðmundur Helgi.

„Mér finnst deildin hafa verið mjög góð í vetur. Góðir leikmenn komu til baka og þetta var skemmtilegt.“

Fréttina í heild sinni má sjá í spilaranum hér að ofan.