Uber segir það gott í Danmörku

Fyrirtækið Uber mun hætta starfsemi sinni í Danmörku vegna nýrra reglna um leigubíla. Meðal þess sem reglurnar segja til um er að skynjarar verði að vera í sætum bíla sem og gjaldmælir. Uber notast við snjallsímaforrit til að reikna út kostnað og fleira og því eru gjaldmælar óþarfir.

Fyrirtækið segist vera með um tvö þúsund ökumenn í Danmörku og að um 300 þúsund manns noti forrit þeirra. Uber mun þó halda áfram að starfa með stjórnvöldum í Danmörku til að reyna að fá reglunum breytt aftur, samkvæmt Guardian.

Deilur og dómsmál vegna þjónustu Uber hafa átt sér stað víða um Evrópu. Bílstjórar hefðbundinna leigubíla og jafnvel stjórnmálamenn segja fyrirtækið ekki fylgja þeim lögum og reglum sem eru í gildi og það gefi þeim samkeppnisforskot.

Meðal annars hafa dómsmál verið höfðuð gegn Uber í voru tveir yfirmenn fyrirtækisins í Evrópu verið ákærðir fyrir að reka ólöglegt leigubílafyrirtæki.

Framkvæmdastjórn Evrópusambandsins hefur hins vegar beðið aðildarríki um að sýna stillingu í baráttunni gegn Uber. Nauðsynlegt sé að skapa umhverfi þar sem nýjar tegundir fyrirtækja geti blómstrað.