Svona lítur hinn nýi Nokia 3310 út

Hulunni hefur verið svipt af hinum glænýja Nokia 3310 síma, sem verður arftaki hins gamla Nokia 3310 sem naut gríðarlegra vinsælda í upphafi 21. aldar. HMD Global, finnskt tæknifyrirtæki, mun framleiða símann með leyfi frá Nokia.

Ljóst er að ekki er um að ræða snjallsíma, þar sem ekki verður hægt að nálgast jafn mörg forrit og á hefðbundnum Android síma. Nýr litaskjár mun hins vegar ekki eyða miklu rafmagni og er búist við að rafhlöðuending símans muni verða allt að 22 klukkustundir í stanslausu tali. 

Síminn mun innihalda 2 megapixla myndavél. Þá verður að sjálfsögðu hægt að spila Snake í símanum, sem er léttari en forveri sinn en á að sögn framleiðanda að vera alveg jafn sterkbyggður. 

Búist er við að síminn muni kosta 49 evrur, sem gera rúmlega 5600 krónur.