Dagný og Margrét Lára báðar með á Algarve | 23 manna hópur klár

Freyr Alexandersson, þjálfari íslenska kvennalandsliðsins í fótbolta, valdi í dag þá 23 leikmenn sem munu taka þátt í Algarve-bikarnum í næsta mánuði.

Eyjakonan Sigríður Lára Garðarsdóttir er í hópnum að þessu sinni en hún á aðeins einn landsleik að baki. Valskonan Thelma Björk Einarsdóttir kemur líka inn í hópinn en hún hefur verið lítið með síðustu ár.

Margrét Lára Viðarsdóttir og Dagný Brynjarsdóttir, sem hafa verið að glíma við meiðsli, eru báðar í hópnum. Margrét Lára er kominn til baka eftir aðgerð en Dagný hefur verið að glíma við bakmeiðsli.

Hólmfríður Magnúsdóttir getur ekki tekið þátt í mótinu vegna meiðsla ekki frekar en Ásgerður St. Baldursdóttir, fyrirliði Íslandsmeistara Stjörnunnar.

Svava Rós Guðmundsdóttir, Berglind Hrund Jónasdóttir og Katrín Ómarsdóttir sem fóru allar með í Kínaferðina í október eru ekki með í hópnum að þessu sinni.

Elín Metta Jensen, Málfríður Erna Sigurðardóttir, Sigríður Lára Garðarsdóttir, Sonný Lára Þráinsdóttir og Thelma Björk Einarsdóttir fóru ekki með til Kína en eru afur á móti í hópnum fyrir Algarve-bikarinn.

Þetta er ellefta árið í röð og þrettánda árið alls sem íslensku stelpurnar eru með í Algarve-bikarnum en þær náðu þriðja sætinu á mótinu í fyrra sem er næstbesti árangur liðsins frá upphafi.

Ísland er að þessu sinni í riðli með Noregi, Japan og Spáni í Algarve-bikarnum og er fyrsti leikurinn á móti Norðmönnum 1. mars næstkomandi.

Íslenska landsliðið er að undirbúa sig fyrir Evrópumótið í Hollandi næsta sumar og eru þetta fyrstu leikir liðsins á árinu 2017.



Landsliðshópur Íslands á Algarve-bikarnum 2017:

Anna Björk Kristjánsdóttir, LB07 (27 landsleikir)

Arna Sif Asgrimsdottir, Val (10 landsleikir)

Berglind Björg Þorvaldsdóttir,  Breiðabliki (19 landsleikir)

Dagný Brynjarsdóttir, Portland (69 landsleikir)

Dóra María Lárusdóttir, Val (113 landsleikir)

Elín Metta Jensen, Val (21 landsleikur)

Elísa Viðarsdóttir, Val (31 landsleikur)

Fanndís Friðriksdóttir, Breiðabliki (76 landsleikir)

Glódís Perla Viggósdóttir,  Eskilstuna Utd (46 landsleikir)

Guðbjörg Gunnarsdóttir, Djurgarden (45 landsleikir)

Gunnhildur Yrsa Jónsdóttir, Valerenga (34 landsleikir)

Hallbera Guðný Gísladóttir,  Djurgarden (76 landsleikir)

Katrín Ásbjörnsdóttir, Stjörnunni (5 landsleikir)

Margrét Lára Viðarsdóttir, Val (112 landsleikir)

Málfríður Erna Sigurðardóttir, Val (28 landsleikir)

Rakel Hönnudóttir, Breiðabliki (75 landsleikir)

Sandra María Jessen, Þór/KA (16 landsleikir)

Sandra Sigurðardóttir, Val (14 landsleikir)

Sara Björk Gunnarsdóttir, Wolfsburg (98 landsleikir)

Sif Atladóttir, Kristianstad (56 landsleikir)

Sigríður Lára Garðarsdóttir, ÍBV (1 landsleikur)

Sonný Lára Þráinsdóttir, Breiðabliki (2 landsleikir)

Thelma Björk Einarsdóttir, Val (10 landsleikir)