Deilt um öryggi gesta í Bláfjöllum: "Þetta líkist rússneskri rúllettu í mínum augum“

„Öryggi gesta Bláfjalla er alltaf í algjörum forgangi,“ segir Magnús Árnason, framkvæmdastjóri skíðasvæðisins í Bláfjöllum, vegna greinar sem Árni Alfreðsson, fyrrverandi snjóaathugunar- og sjúkraflutningamaður, birtir í Fréttablaðinu í dag undir heitinu: Af snjóflóðum og sinnuleysi í Bláfjöllum

Þar gagnrýnir Árni þá sem reka skíðasvæðið í Bláfjöllum og segist líta svo á að öryggi skíðafólks gagnvart snjóflóðum sé langt frá því að vera tryggt í Bláfjöllum. Hann segir áhugaleysi Veðurstofu Íslands í gegnum árin hafa einnig komið á óvart. „Þetta líkist rússneskri rúllettu í mínum augum.“

Árni lýsir atviki sem átti sér stað 26. febrúar árið 2015. Fyrr um morguninn hafði hann lagt til að enginn vinna færi fram á Suðursvæði skíðasvæðisins í Bláfjöllum þar sem snjóflóðahætta er hvað mest. Vildi hann í það minnsta að hættan yrði könnuð en segir stjórnendur ekki hafa hlustað og starfsmenn látnir undirbúa opnuna á Suðursvæði líkt og annars staðar.

„Sjálfur gerðist ég meðvirkur og tók snjóflóðaholu eða próf beint undir helstu hættunni. Brot á grunnreglu snjóathugunarmanna. Og óvirðing við eigið líf. Niðurstöðurnar sendi ég svo Veðurstofunni. Þær voru að talsverð snjóflóðahætta væri. Snjóflóðamat er samt flókið fyrirbæri. Blanda af mælingum og huglægu mati. Þegar skyggni batnaði fór ég um svæðið til að sjá hvort snjóflóð höfðu fallið. Það var þá sem ég lenti í eða kom af stað flóðinu,“ skrifar Árni.

Hálft fjallið á eftir honum

Hann segist hafa verið á leið niður gamalgróna skíðaleið á Eldborgar/Framsvæðinu þegar snjórinn undir vélsleða hans fór skyndilega á hreyfingu.

„Það má segja að hálft fjallið hafi komið á eftir mér úr öllum áttum. Líklega kringum 1000 tonn af snjó. Þrátt fyrir að vera í botngjöf á ca. 100 km. hraða niður brekkuna þá var snjóflóðatungan sem kom frá hlið nánast búin að komast í veg fyrir mig. Af því að dæma hefur aðaltunga flóðsins verið nokkrum metrum aftan við mig. Þarna var ég sekúndur frá dauðanum enda flóðið margra metra djúpt.“

Vissulega snjóflóðahætta

Spurður hvort eitthvað sé til í orðum Árna svarar Magnús framkvæmdastjóri skíðasvæðisins því að Árni hafi verið sjúkragæslumaður á svæðinu á þessum tíma og vissulega sé snjóflóðahætta í Bláfjöllum eins og á öllum öðrum skíðasvæðum.

„Veðurstofan hefur verið með snjóflóðahættumat fyrir skíðasvæði á landinu og skíðasvæðin eru mjög aftarlega þar í forgangsröðun. Við höfum hins vegar sérhæft okkar menn í að meta snjóflóðahættu og ef það er þannig að sá sem metur snjóflóðahætta að einhver lyfta sé í hættu þá opnum við ekki þá hættu og það veit Árni vel,“ segir Magnús.

Eitthvað satt, annað ýkt

Hann segir örugglega margt til í því sem Árni segir en annað sé ýkt, meðal annars að yfirmenn í Bláfjöllum séu hræddir við að loka lyftum.

„Við hlustum algjörlega á þann sem metur snjóflóðahættu. Ef einhver lyfta er í hættu er ekki sú lyfta ekki opnuð. Við höfum þá aðstöðu í Bláfjöllum að geta farið að ofanverðu við snjóflóðahættuna með troðara og reynt að laga. Öll svona flóð eru skráð og Veðurstofan er upplýst um allt sem gerist á svæðinu. Flest flóð falla á lokunardögum og í brjáluðu veðri. Þá er enginn upp frá, hvorki starfsmenn né aðrir. En auðvitað getur myndast snjóflóðahætta og auðvitað geta fallið snjóflóð í einhverjum aftakaveðrum eins og í öllum fjallshlíðum.“

Öryggi gesta í forgangi

Hann segir öryggi gesta Bláfjalla í algjörum forgangi, starfsmenn gangi með snjóflóðaýla á sér, til sé fjöldi snjóflóðaleitarstanga og skóflur og fá allir þjálfun í að leita í flóði.

„Ef það er minnsti grunur á að það sé snjóflóðahætta fyrir ofan einhverja lyftu þá opnum við ekki svæðið, sem er oftast suðursvæðið.“

Hér fyrir neðan er hlekkur á myndaalbúm Árna frá Bláfjöllum