Innlent

Árekstur í hálkunni: Níu tíma bið framundan hjá 190 farþegum í Keflavík

Kolbeinn Tumi Daðason skrifar
Von er á annarri flugvél frá Evrópu síðdegis en brottför er áætluð klukkan 15:40.
Von er á annarri flugvél frá Evrópu síðdegis en brottför er áætluð klukkan 15:40. Vísir/vilhelm
Ekkert varð af flugi Wow Air til Kaupmannahafnar klukkan 6:30 í morgun vegna þess að flugafgreiðslubifreið rann á flugvélina sem var í flugstæði en sú átti að fljúga til Danmerkur. Sleipt var víða á landinu í morgun og Keflavíkurflugvöllur greinilega engin undantekning á því.

Vélin er ónothæf til flugs og hefur önnur verið pöntuð að utan til að ferja farþegana til Kaupmannahafnar síðar í dag. Áætluð brottför er klukkan 15:40.

 Svanhvít Friðriksdóttir, upplýsingafulltrúi Wow, segir í samtali við Vísi að 190 farþegar hafi átt bókað far með vélinni. Þeir hafi fengið upplýsingar og tölvupóst um gang mála og verði áfram haldið upplýstum í dag. Eins og staðan sé núna verði brottför klukkan 15:40.

 Söngkonan Hildur Kristín Stefánsdóttir er einn farþeganna sem sér fram á níu tíma bið í Flugstöð Leifs Eiríkssonar í dag. Hún segir farþega hafa fengið 1500 krónur frá flugfélaginu vegna tafarinnar en sumir farþeganna sjái fram á að missa af tengiflugi sínu í Kaupmannahöfn vegna tafarinnar.

Uppfært klukkan 12:07

Flugvélin var í flugstæði en ekki á flugbrautinni eins og fram kom í fyrri frétt. Beðist er afsökunar á þessu.

Fréttir af flugi

Mest lesið


Fleiri fréttir

Sjá meira


×

Mest lesið