Freyr Alexandersson, þjálfari íslenska kvennalandsliðsins í fótbolta, hefur valið hóp til úrtaksæfinga helgina 25. til 27. nóvember.
Freyr valdi eingöngu leikmenn sem leika með félagsliðum hér á landi og meðal þeirra eru leikmenn sem leikið hafa með yngri landsliðum Íslands á árinu.
Meðal ungu nýliðanna í æfingahópnum er hin fimmtán ára gamla Sveindís Jane Jónsdóttir frá Keflavík, sextán ára gamla Alexandra Jóhannsdóttir frá Haukum og hin sextán ára gamla Guðný Árnadóttir frá FH.
Sveindís Jane Jónsdóttir hefur skorað 7 mörk í 9 leikjum með sautján ára landsliðinu þrátt fyrir að vera spila upp fyrir sig. Hún skoraði 27 mörk í 19 leikjum í 1. deildinni síðasta sumar þar af 9 mörk í 5 leikjum í úrslitakeppninni. Mörg Pepsi-deildarlið voru á eftir henni eftir að Keflavík komst ekki upp en Sveindís Jane ákvað að gera nýjan samning við Keflavík.
Alexandra Jóhannsdóttir hefur þegar leikið 20 leiki fyrir 17 ára landsliðið og skoraði í þeim 9 mörk. Hún var fyrirliði í sjö leikjum sautján ára landsliðsins í ár.
Guðný Árnadóttir er ein af þeim sem spilaði í Pepsi-deildinni í sumar. Guðný var fyrirliði í þremur leikjum 17 ára landsliðsins í ár en hún á að baki 18 leiki fyrir 17 ára landslið Íslands.
Hin sautján ára gamla Stjörnukona Agla María Albertsdóttir er einnig í æfingahópnum en hún stóð sig mjög vel með Íslandsmeisturum Stjörnunnar í Pepsi-deildinni og var með 2 mörk og 5 stoðsendingar í 17 leikjum á sínu fyrsta tímabili í Garðabænum.
Æfingarnar fara fram í Kórnum og Egilshöll og má sjá hópinn hér að neðan.
Selma Sól Magnúsdóttir Breiðablik
Ingibjörg Sigurðardóttir Breiðablik
Sonný Lára Þráinsdóttir Breiðablik
Hildur Antonsdóttir Breiðablik
Guðný Árnadóttir FH
Alexandra Jóhannsdóttir Haukar
Sigríður Lára Garðarsdóttir ÍBV
Sóley Guðmundsdóttir ÍBV
Bryndís Lára Hrafnkelsdóttir ÍBV
Sveindís Jane Jónsdóttir Keflavík
Guðmunda Brynja Óladóttir Selfoss
Agla María Albertsdóttir Stjarnan
Berglind Hrund Jónasdóttir Stjarnan
Lára Kristín Pedersen Stjarnan
Sigrún Ella Einarsdóttir Stjarnan
Arna Sif Ásgrímsdóttir Valur
Thelma Björk Einarsdóttir Valur
Mist Edvardsdóttir Valur
Elín Metta Jensen Valur
Lillý Rut Hlynsdóttir Þór/KA
Anna Rakel Pétursdóttir Þór/KA
Írunn Þ. Aradóttir Þór/KA
Hin fimmtán ára gamla Sveindís Jane í æfingahóp Freys
