Fury gæti misst hnefaleikaleyfið

Þungavigtarmeistarinn Tyson Fury mun væntanlega missa hnefaleikaleyfið sitt í kjölfar þess að hann viðurkenndi kókaínnotkun.

Ricky Hatton missti leyfið sitt í fyrra er hann viðurkenndi að hafa notað eiturlyf. Hann er búinn að senda Fury skilaboð og er til í að hjálpa honum.

Fury er að berjast við þunglyndi og viðurkenndi í viðtali við Rolling Stone að hann væri að nota mikið af kókaíni.

Hann féll á lyfjaprófi í upphafi sumars er kókaín fannst í honum. Það kemur engum á óvart eftir nýjustu uppljóstrunina.

Það mál verður tekið fyrir í næsta mánuði og fátt virðist bíða Fury nema keppnisbann og að hann missi leyfið. Það kemur reyndar út á eitt.

Fury hætti í hnefaleikum í þrjá tíma á mánudag og virðist ekki vera í miklu andlegu jafnvægi.

Hann sagði líka við Rolling Stone að hann vonaðist eftir því að einhver myndi drepa hann áður en hann fremdi sjálfsmorð.