186 laxar á land á einni vakt í Ytri Rangá

Ytri Rangá er sem fyrr aflahæsta áin á þessu tímabili sem er þó ekki lokið en það er ljóst að áin á eftir að klára sumarið á toppnum.

Fluguveiðitímabilinu er lokið og nú má veiða á maðk samhliða flugunni.  Það var heldur betur líflegt á bökkunum þegar á fyrstu vakt eftir að maðkurinn fór út í  en alls var 186 löxum landað.  Það er mikill fiskur í ánni og ennþá er meira en mánuður eftir af tímabilinu svo áinn á mikið inni.  Síðustu tölur úr ánni, sem reyndar eru síðan á miðvikudaginn, gáfu upp 6.309 laxa heildarveiði en hún verður líklega dottin í um 7.000 laxa þegar næsta samantekt hjá Landssambandi Veiðifélaga fer fram næsta miðvikudag.

Það er þegar orðin mikil eftirspurn eftir veiðileyfum á næsta ári og mikill fjöldi veiðimanna sem hefur verið að veiða í sumar bókar sína daga aftur að ári.  Veiðin róaðist aðeins síðustu tvær vikurnar enda hefur verið afar gott veður á landinu sem gerði veiðimönnum veiðina heldur erfiða.  Það er ennþá nokkur fiskur að ganga í Ytri Rangá til viðbótar því magni sem er í ánni svo þeir sem eiga bókaða daga í haust eiga gott í vændum.