Styttist í endurkomu Tiger

Tiger Woods stefnir á að koma aftur út á golfvöllinn í næsta mánuði. Þá verður liðið meira en ár síðan hann keppti síðast.

Hann er búinn að fara í tvær bakaðgerðir síðan hann tók þátt á móti í ágúst á síðasta ári. Meiðslin sem hann hefur glímt við hafa verið afar erfið.

Tiger var besti kylfingur heims í nokkur ár en er nú kominn í sæti 711 á heimslistanum. Hann ætlar að taka þátt á Safeway Open í Kaliforníu þann 13. október.

„Ég er vongóður um að verða klár í það mót,“ sagði Tiger en hann hefur einnig boðað komu sína á mót í nóvember og desember.

Aðrir kylfingar hafa fagnað þessum tíðindum enda hefur vantað ansi mikið á meðan Tiger hefur verið fjarverandi.