Mikil fækkun ferðamanna í París

Hryðjuverkaárásir, tíð verkföll og flóð hafa meðal annars leitt til að fjöldi ferðamanna sem hafa lagt leið sína til frönsku höfuðborgarinnar Parísar hefur verulega dregist saman.

Ferðamenn voru um einni milljón færri á fyrri hluta þessa árs, samanborið við sama tímabil í fyrra. Áætlað er að um sextán milljónir ferðamanna leggi leið sína til Parísar á hverju ári og er borgin einn vinsælasti áfangastaður ferðamanna í heimi.

Í frétt BBC kemur fram að borgin verði af um 100 milljörðum króna vegna fækkunarinnar.

Ferðaþjónusta er ein mikilvægasta atvinnugreinin í landinu. Þannig vinna um hálf milljón manna í ferðaþjónustu í Ile-de-France héraði, þar sem París er meðal annars að finna.

Ferðamönnum fækkaði nokkuð eftir að íslamskir hryðjuverkamenn bönuðu 130 manns í samhæfðum árásum í nóvember á síðasta ári.

Samkvæmt tölum frá ferðamálayfirvöldum í héraðinu hefur ferðamönnum frá Japan fækkað um 46,2 prósent á milli ára, ferðamönnum frá Rússlandi um 35 prósent og ferðamönnum frá Kína um tæp tuttugu prósent.