Lítil veiði á Þingvöllum

Þetta er einn skemmtilegasti tíminn til að veiða við Þingvallavatn því suma daga má sjá litlar torfur af bleikju alveg uppí harða landi.

Það hefur þó lítið borið á þessu í ár en í fyrra var staðan þannig að víða í þjóðgarðinum var bleikjan svo nálægt landi að það var hægt að pota í þær með stangartoppnum.  Það ber lítið á bleikjunni í dag og veiðin i takt við það afar döpur.  Vanir veiðimenn við vatnið hafa verið að núlla dag eftir dag og það sem meira er að murtan hefur ekkert ennþá látið á sér kræla að neinu ráði.  Á þessum árstíma á hún að vera út um allt og gerir mönnum yfirleitt lífið leitt með því að vera alltaf í flugum sem eru ætlaðar stærri fiskum.

Það er engin líkleg skýring á þessu en það kemur heldur ekkert í veg fyrir að veiðimenn halda áfram að fara í vatnið og bíða þess að augnablikið komi þegar gott skot kemur í vatnið því það eru nákvæmlega svoleiðis augnablik sem gera veiðina skemmtilega.