Stelpurnar unnu Belga þar sem varamaður var hetjan í lokin

Íslenska sautján ára landsliðið byrjar vel í milliriðli Evrópumótsins en liðið vann 2-1 sigur á Belgíu í fyrsta leiknum sínum í dag. Milliriðilinn fer fram í Serbíu.

Það var Blikinn Guðrún Gyða Haralz sem var hetja liðsins en hún skoraði sigurmarkið átta mínútum fyrir leikslok.

Freyr Alexandersson, þjálfari íslenska kvennalandsliðsins, byrjar því vel með sautján ára landsliðið en stelpurnar hafa unnið þrjá fyrstu leiki sína undir hans stjórn. Fyrstu tveir leikirnir voru vináttulandsleikir við Skota fyrr á þessu ári.

Íslenska liðið fékk draumabyrjun í leiknum á móti Belgíu í dag þegar Valskonan Hlín Eiríksdóttir skoraði eftir aðeins tveggja mínútna leik en hún skoraði þá eftir stoðsendingu frá Öglu Maríu Albertsdóttur úr Stjörnunni.

Íslensku stelpurnar voru 1-0 yfir í hálfleik en Belgar jöfnuðu metin á 58. mínútu.

Guðrún Gyða Haralz kom inná sem varamaður á 66. mínútu og sex mínútum síðar skoraði hún sigurmarkið eftir stoðsendingu frá fyrirliðanum Kristínu Dís Árnadóttur sem kemur einnig úr Breiðabliki.

Vegna hryðjuverkaárásarinnar í Belgíu var einnar mínútu þögn fyrir leik og leikmenn liðanna léku með sorgarbönd. Starfsfólk beggja liða sameinaðist og stóð saman sem ein heild á meðan mínútu þögnin varði. Leikmenn stóðu á miðju eins og hefð er fyrir.