Conor McGregor sýnir bílaflotann

Írinn Conor McGregor, fjaðurvigtarmeistari í UFC bardagaíþróttinni er ekki feiminn við að sýna vænan bílaflota sinn og víst er að þar fer margur fagur fákurinn.

McGregor á til dæmis Lamborghini Aventador, Rolls Royce, Bentley, Range Rover, Mercedes Benz S500 AMG Coupe, Cadillac Escalade, Ford Mustang og þrjá BMW bíla, þ.e. BMW i8, BMW 4 og BMW 5. Hann hefur því komið sér upp ágætu safni af bílum af dýrari gerðinni og á því sést hversu vel hann þénar af bardagaíþrótt sinni.

Fyrsti bíllinn sem Conor McGregor átti var hinsvegar glæný Opel Astra sem hann átti að greiða af fastar mánaðargreiðslur en við það stóð hann ekki og því var bíllinn sóttur heim til hans af Opel. Þannig er ekki komið fyrir McGregor nú, hann staðgreiðir bíla sína og safnar þeim eins og margur annar nýríkur maðurinn.

Sjá má hluta af bílasafni hans í meðfylgjandi myndskeiði og þar bregður fyrir okkar manni, Gunnari Nelson fyrir framan BMW i8 bíl Conors.