Veðrinu slotar ekki á Vestfjörðum fyrr en seint í kvöld

Enn er hvassviðrði og stormur á Norðurlandi og fyrir austan og á Vestfjörðum. Vakthafandi veðurfræðingur hjá Veðurstofu Íslands segir að fyrir norðan og austan taki brátt að lægja en ekki er búist við að veðrinu sloti á Vestfjörðum fyrr en seint í kvöld. Sex hús voru rýmd á Patreksfirði í gærkvöldi vegna snjóflóðahættu og óvissustig er á öllum Vestfjörðunum. Þá fellur skólahald niður í Vesturbyggð í dag.

Var rýmingarreitur 4 á Patreksfirði rýmdur en um er að ræða sex hús sem standa við Urðargötu. Átján manns búa í þessum sex húsum og fóru fimm þeirra í fjöldahjálparstöð Rauðakrossdeildarinnar á Patreksfirði sem hefur verið komið upp á Fosshótelinu í byggðarlaginu.

Veðurfræðingur segir að töluvert hafi bætt í snjóinn í nótt fyrir vestan og í ljósi þess að það spáir áframhaldandi ofankomu í allan dag verður fylgst náið með ástandinu á svæðinu. Á Patreksfirði er hættustig í gildi en óvissustig annars staðar á Vestfjörðum og verður ástandið metið í birtingu.

Þá eru flestir vegir á Vestfjörðum lokaðir vegna ófærðar og er beðið með mokstur vegna veðurs, að því er fram kemur á vef Vegagerðarinnar. Flestar leiðir á Norður- og Austurlandi eru einnig ófærar, þar á meðal Öxnadalsheiði, Víkurskarð, Fagridalur og Fjarðarheiði. Þá er Þjóðvegur 1 lokaður frá Kirkjubæjarklaustri að Hvalsnesi.

Færð og aðstæður:

Hálkublettir eru á Reykjanesbraut og á Suðurnesjum. Hálka er á Sandskeiði, á Hellisheiði og í Þrengslum. Hálka eða snjóþekja er á flestum leiðum á Suðurlandi. Þæfingsfærð er undir Eyjafjöllum, á Reynisfjalli og Mýrdalssandi.

Á Vesturlandi er snjóþekja á flestum leiðum en þó er þungfært á Vatnaleið og lokað á Fróðárheiði. Ófært er á norðanverðu Snæfellsnesi og þæfingsfærð á sunnanverðu nesinu. Verið er að hreinsa. Ófært er í Svínadal en snjóþekja á Bröttubrekku og þæfingsfærð á Holtavörðuheiði.

Flestar leiði á Vestfjörðum eru ófærar og beðið með mokstur vegna veðurs.

Snjóþekja og snjókoma er í Húnavatnssýslum en annars eru flestar leiðir á Norður- og Austurlandi ófærar.   

Veðurhorfur á landinu:

Austan 20-28 metrar á sekúndu norðan og austan til, hvassast á annesjum og snjókoma, en sunnan og suðaustan 8-13 og él sunnan til. Sunnan og suðustan 8-15 og víða él í dag, en norðaustan 20-28 og snjókoma á Vestfjörðum til kvölds. Bætir heldur í vind og úrkomu sunnan og austan til með kvöldinu. Austan og norðaustan 8-13 og dálítil él á morgun, en 13-18 á Vestfjörðum. Hiti 0 til 5 stig sunnanlands, en frost annars 0 til 5 stig.