Hlakka til framtíðarinnar

Albanska Telati fjölskyldan er í skýjunum yfir að hafa fengið dvalarleyfi á Íslandi í gær, en þau eru fyrstu Albanarnir sem fá dvalarleyfi  hér á landi á grundvelli Útlendingalaga. Þau eru full tilhlökkunar fyrir framtíðinni.

Telati fjölskyldan komst fyrst í fréttirnar í september þegar Fréttablaðið greindi frá því að börnin þrjú höfðu ekki fengið skólavist þrátt fyrir að hafa dvalið á landinu frá því í júní. Fór svo að börnin fengu inni í skóla í Laugarneshverfinu og kunnu öll vel við sig þar. 

Í október synjaði Útlendingastofnun fjölskyldunni svo um dvalarleyfi en sú ákvörðun vakti mikla reiði í samfélaginu. Tíu þúsund manns skrifuðu til að mynda undir undirskriftarlista þar sem stjórnvöld voru hvött til að leyfa fjölskyldunni að vera áfram á Íslandi. 

Krakkarnir voru í skólanum þegar þeim bárust gleðifréttirnar í gær. 

„Allir fóru að gráta og ég spurði hvað væri um að vera. Þá var mér sagt að við fengjum að vera um kyrrt. Það voru allir grátandi og ég var agndofa, ég vissi ekki hvað var að gerast,“ segir Laura Telati sem er elst systkinanna þriggja.

Fjölskyldunni var veitt dvalarleyfi af mannúðarástæðum og vegna sérstakra tengsla þeirra við landið. Albanir eru stærsti hópur hælisleitenda hér á landi en umsóknum þeirra hefur hingað til öllum verið hafnað. Ákvörðunin kom fjölskyldunni því nokkuð á óvart. 

„Ég var mjög hissa, ég hélt við fengjum ekki að vera hérna. Pabbi var vanur að segja að við gætum orðið fyrsta fjölskyldan sem fengi jákvætt svar, og það reyndist satt. Ég er svo ánægð,“ segir Janie sem er þrettán ára. 

Foreldrarnir Hasan og Aleka eru bæði komin með vinnu og hlakka til að takast á við daglegt líf án ótta um að vera vísað úr landi.

„Nú getum við farið að gera áætlanir um hvað við viljum gera. Þetta er ótrúlegt og maður finnur til mikils léttis. Nú getum við unnið og notið lífsins áhyggjulaust eins og allir aðrir og séð fyrir fjölskyldunni,“ segir Aleka með bros á vör.