Eggert Gunnþór: Vonandi vita Lars og Heimir af mér

Eggert Gunnþór Jónsson, leikmaður Fleetwood Town í ensku C-deildinni, vonast til að komast í landsliðið aftur á næstunni og helst að fara með strákunum okkar á EM í Fraklandi í sumar.

Austfirðingurinn var fastamaður í landsliðinu um árabil en mikil meiðsli hafa sett strik í reikninginn hjá honum undanfarin misseri.

Hann hefur í heildina spilað 19 landsleiki, en Eggert spilaði síðast fyrir Ísland í 2-0 tapi gegn Sviss í undankeppni HM 2014 í október 2012.

„Það er alltaf markmið mitt að komast aftur í landsliðið. Vonandi vita þjálfararnir af mér,“ segir Eggert Gunnþór í viðtali við Fleetwood Today. „Ég er viss um það, ég hef verið í hópnum nokkru sinni áður.“

Eggert Gunnþór er kominn aftur á gott ról eftir langvarandi meiðsli. Hann hefur verið í byrjunarliðinu hjá Fleetwood í síðustu tólf deildarleikjum og í heildina spilað 18 af 25 deildarleikjum liðsins á tímabilinu.

„Ég er bara ánægður með að vera byrjaður að spila aftur og reyna að hjálpa Fleetwood að klifra upp töfluna,“ segir Eggert Gunnþór Jónsson.