FH-ingar að semja við færeyskan landsliðsmann

Færeyska fréttasíðan joanisnielsen.fo segir frá því í kvöld að færeyski landsliðsmaðurinn Sonni Ragnar Nattestad sé búinn að gera samning við Íslandsmeistara FH.

Jn.no segir frá því að Sonni Ragnar Nattestad hafi farið til Íslands í dag til að ganga frá tveggja ára samningi við Hafnarfjarðarliðið.

Sonni Ragnar Nattestad er 21 árs gamall og 197 sentímetrar á hæð. Hann spilar sem miðvörður en getur einnig leyst stöðu vinstri bakvarðar.

Sonni Ragnar hefur verið án félags en lék síðast með danska félaginu FC Midtjylland.

Nattestad var lánaður til bæði AC Horsens og Vejle BK þessi tvö tímabil hans með Midtjylland.

Sonni Ragnar Nattestad á að baki tólf landsleiki fyrir Færeyjar. Hann byrjaði alla tíu leiki liðsins í undankeppni EM 2016 þar á meðal sigurleikina tvo á móti Grikkjum.

Sonni Ragnar verður annar færeyski landsliðsmaðurinn hjá FH því fyrir hjá liðinu er landsliðsmarkvörðurinn Gunnar Nielsen sem kom til liðsins frá Stjörnunni í vetur.