Heimir: Skammast mín fyrir Laugardalsvöll

Heimir Hallgrímsson, annar landsliðsþjálfara Íslands, skammast sín fyrir þá aðstöðu sem boðið er upp á á Laugardalsvellinum, þjóðarleikvangi Íslands.

„Fyrir það fyrsta þá skammast maður sín alltaf fyrir hvern einasta landsleik [á heimavelli],“ sagði Heimir í viðtali við Áramótablað Viðskiptablaðsins.

Meðal þess sem hann nefnir er að búningsklefarnir voru byggðir fyrir 20 árum síðan þegar gert var ráð fyrir sextán leikmönnum í hverju liði. Þeir séu nú 23 og oft séu jafn margir starfsmenn með liðunum.

„Allur þessi hópur kemst ekki inn í þessa litlu búningsklefa,“ sagði Heimir. „Stundum sér maður fjörtíu töskur úti á gangi því það er ekki hægt að koma þeim fyrir inni í klefanum.“

Hann segist hafa komið víða við og að aðstaðan á Laugardalsvelli sé sú langversta sem hann hafi kynnst.

„Við getum ef til vill ekki borið okkur saman við stóru þjóðirnar, sem eiga fullt af peningum, en það er samt svolítið fúlt að lið sem spila jafnvel í 2. deildinni á Englandi séu með miklu betri aðstöðu en boðið er upp á á þjóðarleikvangi Íslands,“ sagði Heimir og bætir við að hann vildi losna við hlaupabrautina eins og svo margir stuðningsmenn landsliðsins.

„Stemningin á Laugardalsvelli hefur verið frábær í undanförnum landsleikjum en hún væri enn þá betri ef hlaupabrautin væri ekki þarna og völlurinn hannaður sérstaklega fyrir fótboltaleiki.“