Theodór frá í 4-5 vikur

Hornamaðurinn Theodór Sigurbjörnsson verður frá næstu 4-5 vikurnar samkvæmt Arnari Péturssyni, þjálfara ÍBV.

Theodór var verðlaunaður fyrir góða frammistöðu á tímabilinu með landsliðssæti en hann meiddist á æfingamótinu í Noregi um helgina.

ÍBV tapaði í kvöld fyrir Fram, 26-21, í Olísdeild karla og saknaði Theodórs greinilega.

„Eftir því sem landsliðsteymið sagði þarna úti þá eru þetta einhverjar fjórar til fimm vikur. Það þýðir einhverjir tíu leikir í okkar prógrammi. Það er þétt spilað og á 40 daga tímabili eigum við ellefu leiki svo það er slatti af leikjum sem hann missir af,” sagði Arnar Pétursson, þjálfari ÍBV, við Vísi í kvöld.