Zidane: Hazard er mitt uppáhald á eftir Ronaldo og Messi

Zinedine Zidane, fótboltagoðið sem nú þjálfar varalið Real Madrid, heldur mest upp á Cristiano Ronaldo og Lionel Messi eins og svo margir aðrir, en í þriðja sæti hjá honum er Belginn Eden Hazard.

Hazard, sem var kjörinn besti leikmaður síðasta tímabils á Englandi, hefur verið orðaður við Real Madrid undanfarna mánuði, en hann hefur ekki náð sér á strik með Chelsea í vetur.

„Hazard er uppáhaldsleikmaðurinn minn á eftir Ronaldo og Messi. Það er stórkostlegt að horfa á hann spila,“ segir Zidane.

Belginn var keyptur til Chelsea fyrir 32 milljónir punda sumarið 2012 og hefur verið frábær fyrir Lundúnarliðið síðan.

Hann átti stóran þátt í að tryggja liðinu Englandsmeistaratitilinn í vor, en hann var nánast óstöðvandi í úrvalsdeildinni á síðustu leiktíð.

„Væri ég til í að sjá hann í Real Madrid? Eina sem ég segi er að ég elska hann sem leikmann. Ég er viss um að hann mun koma sér upp úr þessari lægð,“ segir Zinedine Zidane.