Sala Audi jókst um 7% í september

Engu máli skipti fyrir sölu Audi bíla að nokkrir bílar fyrirtækisins hafi í nokkur ár verið með svindlhugbúnað frá móðurfyrirtækinu Volkswagen. Kaupendur virðast kæra sig kollótta um það og kaupa áfram glæsta lúxusbíla Audi.

Salan í september jókst um 7% og er söluaukning ársins hjá Audi nú 3,8% og alls hafa selst 1,35 milljón bílar. Í ljósi erfiðra markaðsaðstæðna á þriðja fjórðungi ársins er söluaukning Audi góð sagði sölustjóri Audi, Luca de Meo, en hann mun brátt taka yfir sem forstjóri Seat, eins af undirmerkjum Volkswagen.

Audi mun kynna 15 nýja eða endurbætta bíla fram að miðju næsta ári og það ætti ef eitthvað er enn að auka sölu á Audi bílum. Salan í Kína hjá Audi jókst um 2,9% og hýfði það heildarsöluna þar í landi næstum upp að sömu tölu á árinu og í fyrra, en söluminnkunin er samt 0,3% í Kína.

Athygli vekur að salan í Bandaríkjunum jókst um 16% þrátt fyrir að dísilvélasvindlið hafi uppgötvast þar í landi. Salan í Evrópu jókst um 8,8% í september.