Kynning Microsoft slær í gegn

Tæknirisinn Microsoft kynnti í gær fjölmörg ný tæki frá fyrirtækinu. Kynningin hefur vakið mikla athygli og er talin vera sú besta sem Microsoft hefur haldið. Fjölmiðlar ytra hafa farið fögrum orðum um bæði kynninguna sjálfa og þau tæki sem voru kynnt.

Meðal þess sem fyrirtækið kynnti var Surface Book fartölvan, Surface Pro 4 spjaldtölvan, tveir nýir snjallsímar, Microsoft Band 2 heilsuarmbandið, Hololens heilmyndargleraugun og nýjungar hjá Xbox One.

Það tæki sem stal þó senunni var Surface Book fartölvan. Microsoft segir hana vera mun betri en MacBook Pro. Um er að ræða fartölvu sem einnig virkar sem spjaldtölva. Allur búnaður, að þrívíddarstýringunni undanskilinni, er staðsettur í skjánum.

Surface Book fartölvan

Þá kynnti Microsoft einnig nýja spjaldtölvu og viti menn, það er einnig hægt að nota hana sem fartölvu. Surface Pro 4 spjaldtölvan er þynnri og léttari en forveri sinn og þar að auki er hún mun kröftugari.

Þá hefur skjárinn verið stækkaður og upplausn hans betrumbætt.

Surface Pro 4 spjaldtölvan

Microsoft hefur farið sífellt lengra inn á þá braut að samnýta tæki og kerfi í gegnum Windows 10. Nýjustu snjallsímar Microsoft; Lumia 950 og 950 XL eru þar engin undantekning. Auðvelt er að tengja bæði lyklaborð og skjá við símana svo hægt sé að nota þá sem borðtölvur.

Microsoft sýndi einnig hið einstaka tæki Hololens. Á þeirri kynningu barðist starfsmaður fyrirtækisins við vélmenni sem enginn gat sé og heilmynd af einhvers konar byssu utan um hendina.

Hololens varpar heilmyndum í okkar nánasta umhverfi og þannig gætu notendur horft á bíómyndir á veggnum heima hjá sér og margt margt fleira.

Project X-Ray. Hololens sýning Microsoft Samantekt The Verge af því besta frá kynningu Microsoft.