Gaupi um Ísak Rafnsson: Drengurinn var eins og slytti gegn Gróttu

Guðjón Guðmundsson, íþróttafréttamaður hjá 365, var á meðal gesta hjá Hirti Hjartarsyni í útvarpsþættinum Akraborginni í dag.

Gaupi fór þar yfir byrjunina á Olís-deild karla í handbolta en fyrstu tveimur umferðum deildarinnar er lokið. Sú þriðja hefst svo í kvöld með fjórum leikjum.

„Þetta fer af stað eins og menn reiknuðu með,“ sagði Gaupi. „Auðvitað er deildin svolítið brennimerkt af því að í flestum liðum deildarinnar eru mjög ungir leikmenn. Þetta er eiginlega ungmennadeild. Okkur vantar tilfinnanlega reynslumeiri leikmenn.

„Ef þú ferð yfir þann hóp leikmanna sem eru að leika í deildinni, þá eru þeir leikmenn teljandi á fingrum annarar handar sem eru í alþjóðlegum gæðaflokki; það vill segja leikmenn sem gætu hugsanlega spilað í 3-4 bestu deildum heims.“

Sjaldan verið jafn mikill efniviður í deildinni

Gaupi tekur þó fram að það séu margir efnilegir leikmenn í Olís-deildinni, þ.á.m. strákarnir í U-19 ára landsliðinu sem vann til bronsverðlauna á HM í Rússlandi í síðasta mánuði.

„Ég held að deildin hafi sjaldan eða aldrei verið jafn vel mönnuð af ungum og efnilegum leikmönnum og nú,“ sagði Gaupi sem setur spurningarmerki við þá ákvörðun margra íslenskra leikmanna að spila í lakari deildum, s.s. í Noregi og Svíþjóð.

„Það sem hefur svolítið verið að gerast hjá okkur á undanförnum árum er að leikmenn hafa verið að sækja í léttari deildir, farið til Svíþjóð, jafnvel brugðið sér til Noregs og leikið í 2. deildinni í Þýskalandi. Mér finnst þetta ekki heppileg þróun.

„Menn hafa líka verið að fara til Danmerkur sem er mjög sterk deild. En danska deildin, eins og hún er skipuð í dag, er líklega slakasta danska deildin í áratug.“

Afturelding verður í erfiðleikum

Gaupi telur að Valur, Haukar og ÍBV muni berjast á toppi Olís-deildarinnar í vetur.

„Það eru fyrst og síðast þrjú lið sem mér líst best á, það eru Valur, Haukar og ÍBV. Ég held að þetta séu þrjú sterkustu liðin,“ sagði Gaupi og bætti því að Afturelding, silfurliðið frá því í fyrra, gæti verið í vandræðum framan af vetri.

„Afturelding hefur misst mikið af leikmönnum. Elvar Ásgeirsson meiddist í aðdraganda tímabilsins, Jóhann Gunnar Einarsson er meiddur og Örn Ingi Bjarkason er farinn, þannig að þeir verða í erfiðleikum, í það minnsta framan af móti.“

Gaupi segir að gott starf sé unnið hjá liðum eins og ÍR og Fram og þá er hann hrifinn af nýliðum Gróttu sem kjöldrógu FH-inga á mánudaginn, 33-26.

„Ég sá leik Gróttu og FH og var afar hrifinn af Gróttuliðinu. Það er reyndar gríðarlega mikið af ungum strákum í liðinu en þeir eru mjög vel á sig komnir og greinilega mjög vel líkamlega þjálfaðir. Þeir voru skynsamir og spiluðu góðan bolta

„Þar eru leikmenn sem eru mjög athyglisverðir. Viggó Kristjánsson, fyrrverandi fótboltamaður sem valdi handboltann fyrir tveimur árum, og hefði átt að gera það miklu fyrr, er frábær leikmaður. Svo er leikstjórnandinn Aron Dagur Pálsson gríðarlega mikið efni,“ sagði Gaupi sem var ekki jafn hrifinn af FH-liðinu.

Líkamlegt ástand FH-inga ekki nógu gott

„Mér fannst Gróttumenn vera í mjög góðu líkamlegu ásigkomulagi. Það hefur vantað hjá okkur undangengnum árum og sá þáttur hefur verið vanræktur.

„FH-ingar ollu mér gríðarlegum vonbrigðum, einfaldlega vegna þess að mér fannst þeir ekki tilbúnir líkamlega í þennan slag. Þar eru leikmenn sem ég hef verið mjög hrifinn af, eins og Ísak Rafnsson sem ég hélt að yrði landsliðsmaður.

„En drengurinn var eins og slytti í þessum leik og miðað við þennan leik hefur hann litlu bætt við sig á síðustu tveimur árum. Hann þarf heldur betur að bíta í skjaldarrendur því þetta er drengur, sem með réttri þjálfun og góðri ástundun, getur komist í bestu deildir heims,“ sagði Gaupi.

Hlusta má á viðtalið í heild sinni hér að ofan.