Stjórnarandstaðan í Grikklandi vill ekki kosningar

Ríkisstjórn Alexis Tsipras, forsætisráðherra Grikklands, virðist ætla að lifa af hremmingar undanfarna vikna. Leiðtogar helstu stjórnarndstöðuflokka telja ekki þörf á kosningum í bráð en vara forsætisráðherrann við frekari ævintýramennsku sem stefnt gæti aðild Grikkja að evrunni í hættu.

Spennan er aðeins að minnka í Grikklandi eftir óróleikann þar undanfarnar vikur. En eftir að tæplega einn þriðji þingmanna Syriza, stjórnarflokks Tsipras, greiddi atkvæði gegn björgunarpakka Evrópu á þingi í síðustu viku, hafa verið uppi getgátur um nýjar þingkosningar í landinu. En aðeins eru liðnir sex mánuðir frá því Syriza vann góðan sigur í kosningum í Grikklandi.

Björgunarpakkinn var samþykktur með stuðningi borgaralegra miðju- og hægriflokka sem mega ekki til þess hugsa að Grikkir yfirgefi evrusamstarfið, hvað þá Evrópusambandið sjálft. Margir töldu að stjórnarandstaðan myndi nota veikari stöðu forsætisráðherrans til að knýja fram kosningar.

„Kosningar í haust myndu hafa í för með sér algert öngþveiti. Efnahagurinn myndi ekki þola það og millistéttin lifir ekki af annað mislukkað ævintýri,“ segir Stavros Theodorakis, formaður Patomi flokksins, sem bauð fyrst fram í síðustu kosningum og fékk 17 þingsæti af þeim 300 sem eru á gríska þinginu.

Landið logaði nú stafnana á milli og enn ekki útséð með björgun. Nú skipti öllu máli að þjóðin og þar með stjórnmálaflokkarnir stæðu saman í að bjarga landinu. Bankar voru opnaðir í gær eftir að hafa verið lokaðir í um þrjár vikur og aðeins var slakað á klónni með hámarksútektir fólks af reikningum sínum og meirihluti almennings virðist styðja forsætisráðherrann.

Fofi Genimmata, formaður Pasok, sósíaldemókrataflokks Grikklands, varar Tsipras þó við að fara út af sporinu í samskiptum við Evrópusambandið.

„Forsætisráðherrann verður fyrst og fremst að skuldbinda sig og lýsa því yfir að það verði engar kosningar fyrr en það er alveg tryggt að möguleiki á útgöngu Grikklands úr evrusamstarfinu (Grexit) sé að baki okkur,“ sagði Genimmata.